టోల్ ప్లాజా వద్ద ఆగివున్న కార్లను ఢీకొట్టిన ఇన్నోవా.. ముగ్గురి మృతి

టోల్ ప్లాజా వద్ద ఘోరం జరిగింది. ఈ టోల్ ప్లాజాలో ఆగివున్న కార్లను ఇన్నోవా వాహనం ఢీకొట్టింది. ఈ ప్రమాదంలో ముగ్గురు మృత్యువాతపడ్డారు. అలాగే, ప్రమాదంలో మొత్తం ఆరు వాహనాలు దెబ్బతిన్నాయి. ముగ్గురు చనిపోగా మరొకరు తీవ్రంగా గాయపడ్డారు. ఈ ప్రమాదం మహారాష్ట్ర రాజధాని ముంబైలో గురువారం రాత్రి జరిగింది. 

టోల్ ప్లాజా వద్ద ఆగివున్న పలు వాహనాలను అతివేగంగా దూసుకొచ్చిన ఓ ఇన్నవో కారు ఢీకొట్టింది. గురువారం రాత్రి వర్లీ నుంచి బాంద్రా వైపు వెళుతున్న ఇన్నోవా కారు ఈ ప్రమాదానికి కారణమైందని పోలీసులు వెల్లడించారు. సీ లింకులో ఉన్న టోల్ ప్లాజాకు 100 మీటర్ల ముందు మొదట మెర్సిడెస్ కారును ఢీకొట్టింది. 

ఆ తర్వాత మరో రెండు మూడు వాహనాలను ఢీకొట్టిందని డీసీపీ కృష్ణకాంత్ ఉపాధ్యాయ వెల్లడించారు. మెర్సిడెస్, ఇన్నోవా సహా మొత్తం ఆరు కార్లు ప్రమాదానికి గురయ్యాయని వివరించారు. ఈ ప్రమాదంలో గాయపడిన వారిలో ఇద్దరి పరిస్థితి విషమంగా ఉందని చెప్పారు. మరో నలుగురి పరిస్థితి నిలకడగా ఉన్నట్టు ఆయన తెలిపారు. 

కారు డ్రైవర్ అతివేగం.. ఓ కుటుంబాన్ని బలి తీసుకుంది... 

రోడ్డు ప్రమాదాల నివారణ కోసం ప్రభుత్వాలతో పాటు ట్రాఫిక్ పోలీసులు ఎన్నో రకాలైన సేఫ్టీ కార్యక్రమాలు నిర్వహిస్తుంటారు. ఇందుకోసం విస్తృతంగా ప్రచారం చేస్తుంటారు. అయినప్పటికీ వాహనచోదకులు అతివేగంతో వాహనాలను నడుపుతూ ప్రమాదాలకు గురవుతుంటారు. తద్వారా తాము ప్రమాదాలకు గురికావడమే కాకుండా, ఎదుటివారిని కూడా కష్టాలకు గురిచేస్తుంటారు. ఎవరో చేసిన తప్పుకు మరెవరో బలైపోతున్నారు. తద్వారా అనేక కుటుంబాలు ఛిన్నాభిన్నమైపోతున్నాయి. 

తాజాగా ఓ కారు డ్రైవర్ నిర్లక్ష్యానికి తండ్రీకూతుళ్లు ప్రాణాలు విడిచారు. ఈ షాకింగ్ వీడియోను తెలంగాణ ఆర్టీసీ ఎండీ వీసీ సజ్జనార్ తాజాగా షేర్ చేశారు. గుజరాత్లో ఇటీవల జరిగిన భయానక రోడ్డు ప్రమాదానికి సంబంధించిన వీడియో ఇది. ఆనంద్ ప్రాంతంలో ఓ కారు మరో వాహనాన్ని ఓవర్ టేక్ చేసే ప్రయత్నంలో అతివేగంగా వెళుతూ ఎదురుగా ద్విచక్రవాహనాన్ని ఢీకొట్టింది. ఈ క్రమంలో బైకుపై ఉన్న భార్యాభర్తలు వారి ఐదేళ్ల కుమార్తె ఒక్కసారిగా గాల్లో ఎగిరిపడ్డారు. తండ్రి, కుమార్తె అక్కడికక్కడే మృతి చెందగా, తల్లికి తీవ్ర గాయాలయ్యాయని సజ్జనార్ తెలిపారు. అతివేగం తెచ్చిన అనర్థం ఇదంటూ విచారం వ్యక్తం చేశారు. ఈ వీడియో ప్రస్తుతం నెట్టింట వైరల్ అయింది.