కిరణ్ బేడీకి రెండు ఓటరు గుర్తింపు కార్డులు.. మా సిబ్బంది తప్పిదం : ఈసీ క్లీన్ చిట్
ఢిల్లీ బీజేపీ ముఖ్యమంత్రి అభ్యర్థి కిరణ్ బేడీ రెండు ఓటరు గుర్తింపు కార్డులు కలిగివుండటమే భారత ఎన్నికల సంఘం గురువారం వివరణ ఇచ్చింది. ఇది తమ సిబ్బంది తప్పిదం వల్ల ఈ పరిస్థితి ఏర్పడిందని చెప్పుకొచ్చింది. దీంతో ఆమెకు ఎన్నికల సంఘం క్లీన్ చిట్ ఇచ్చినట్టయింది.
ఓటు బదిలీ కోసం ఆమె దరఖాస్తు చేసుకున్నారని, అయితే తమ సిబ్బంది పొరబాటు కారణంగా రెండు ఓటర్ గుర్తింపు కార్డులున్నట్టు వచ్చిందని ఈసీ తెలిపింది. అసలు సమాచారాన్ని తమ వెబ్ సైట్‌లో అప్ డేట్ చేయలేదని చెప్పింది. కాగా, బేడీకి రెండు ఓటర్ గుర్తింపు కార్డులు జారీ చేసినట్టు ఎన్నికల సంఘం రికార్డు ద్వారా ఈ ఉదయం తెలిసింది.
అంతకుముందు వేర్వేరు చిరునామాలతో ఆమె రెండు ఓటర్ గుర్తింపు కార్డులు ఉన్నాయంటూ విపక్ష సభ్యులు ఫిర్యాదు చేసిన విషయం తెల్సిందే. వెంటనే రంగంలోకి దిగిన ఎన్నికల సంఘం ఈ అంశాన్ని తేల్చేసింది. ఎన్నికల సంఘం రికార్డు ప్రకారం... రాజధానిలోని ఉదయ్ పార్క్, తల్కతోరా లేన్ చిరునామాలతో ఓటర్ గుర్తింపు కార్డులు ఇచ్చారట. ఇదే విషయంపై బేడీని మీడియా అడిగితే ఖండించారు.
