Vijay as Pawan: పవన్‌లా వుండిపో.. పీకే సూచన.. పళని సీఎం అయితే విజయ్ డిప్యూటీ సీఎం?
తమిళనాడు అసెంబ్లీ ఎన్నికల్లో అన్నాడీఎంకే అధినేత, తమిళనాడు మాజీ ముఖ్యమంత్రి ఎడప్పాడి కె. పళనిస్వామిని ముఖ్యమంత్రి అభ్యర్థిగా ప్రకటించాలని, నటుడు, రాజకీయ నాయకుడు విజయ్ ఉప ముఖ్యమంత్రి పాత్రను చేపట్టాలని ఎన్నికల వ్యూహకర్త ప్రశాంత్ కిషోర్ సూచించినట్లు సమాచారం.
తమిళగ వెట్రి కళగం (టీవీకే) కు నాయకత్వం వహిస్తున్న విజయ్, ఎన్నికల వ్యూహరచన కోసం ప్రశాంత్ కిషోర్ నైపుణ్యాన్ని ఉపయోగించుకున్నారు. విజయ్ గతంలో డిఎంకె, బిజెపి రెండింటినీ తన రాజకీయ విరోధులుగా ప్రకటించారు. అయితే.. ప్రస్తుత పరిస్థితుల్లో ఏపీలా పవన్ ఎలా వున్నారో.. అలాంటి పొత్తుతో ముందుకు పోవాలని విజయ్‌కి ప్రశాంత్ కిషోర్ సలహా ఇచ్చినట్లు తెలుస్తోంది.
ఇందుకోసం ఎఐఎడిఎంకెతో పొత్తును పరిగణించాలని కిషోర్ విజయ్‌కు సలహా ఇచ్చారని టాక్ వస్తోంది. ఈ విషయంపై కిషోర్ ఇప్పటికే ఎఐఎడిఎంకెతో చర్చలు ప్రారంభించారని తెలుస్తోంది. ప్రశాంత్ కిషోర్ లెక్కల ప్రకారం, ప్రస్తుతం ఎఐఎడిఎంకె దాదాపు 25శాతం ఓట్ల వాటాను కలిగి ఉంది.
అయితే టీవీకే 20శాతం వరకు ఓట్లను పొందవచ్చు. ఇతర పార్టీలను కూటమిలోకి తీసుకుంటే, వారు 50శాతం ఓట్ల పరిమితిని దాటే అవకాశం ఉంది. ఆంధ్రప్రదేశ్ రాజకీయాల తరహాలో ఏపీలో చంద్రబాబు నాయుడు, పవన్ కళ్యాణ్ మధ్య పొత్తు ఎన్నికల విజయానికి ఎలా దారితీసిందో విజయ్‌కు వివరించారని తెలుస్తోంది.
టీవీకేను ఏఐఏడీఎంకేతో జతకట్టడం వంటి వ్యూహం తమిళనాడులో విజయవంతమైన ఫలితాన్ని ఇస్తుందని ప్రశాంత్ కిషోర్ సూచించినట్లు సమాచారం. ఈ వ్యూహంలో భాగంగా, కిషోర్ పళనిస్వామిని ముఖ్యమంత్రి అభ్యర్థిగా సిఫార్సు చేయగా, విజయ్ ఉప ముఖ్యమంత్రి పాత్రను చేపట్టాలని భావిస్తున్నారు. కిషోర్ సూచనలకు విజయ్ సానుకూలంగా స్పందించారని టీవీకే వర్గాలు సూచిస్తున్నాయి.
