తెలంగాణ: హెల్త్ డిపార్ట్‌మెంట్‌లో 1326 ఖాళీలు.. నోటిఫికేషన్ విడుదల
తెలంగాణ నిరుద్యోగులకు గుడ్ న్యూస్ చెప్పింది. ఖాళీగా ఉన్న వైద్య ఉద్యోగాలను భర్తీ చేసేందుకు రాష్ట్ర ప్రభుత్వం నోటిఫికేషన్ జారీ చేసింది.
అందులో భాగంగా మొత్తం 1,326 ఉద్యోగాలను భర్తీ చేయనున్నారు. నోటిఫికేషన్ ప్రకారం ఖాళీల వివరాలు ఈ విధంగా ఉన్నాయి. జులై 15 నుంచి ఆగస్టు 14 వరకు ఆన్‌లైన్‌లో దరఖాస్తు చేసుకునే అవ‌కాశం ఉంది.
సివిల్ అసిస్టెంట్ సర్జన్ పోస్టులు(పబ్లిక్ హెల్త్, ఫ్యామిలీ కేర్) 751, ట్యూటర్ పోస్టులు 357, సివిల్ అసిస్టెంట్ సర్జన్ (వైద్య విధాన్) 211, సివిల్ అసిస్టెంట్ సర్జన్ (ప్రివెంటివ్ మెడిసిన్) 7 పోస్టులు ఉన్నాయి.
నోటిఫైడ్ పోస్టులకు దరఖాస్తు చేసుకోవడానికి వెబ్‌సైట్ https://mhsrb.telangana.gov.in ను సంప్రదించవచ్చు. .
సీనియారిటీని బట్టి సీఏఎస్ పోస్టులకు నెలవారీ వేతన స్కేలు రూ.58,850 నుంచి రూ.1,37,050 వరకు, ట్యూటర్ల పోస్టులకు 2016 యూజీసీ స్కేల్ ఆధారంగా రూ.57,700 నుంచి రూ.1,82,400 వరకు ఉంటుంది.
100 పాయింట్ల ఆధారంగా దరఖాస్తుదారులను ఎంపిక చేస్తారు. ఇందులో క్వాలిఫైయింగ్ పరీక్షలో సాధించిన మార్కుల శాతం కోసం గరిష్టంగా 80 పాయింట్లు ఇవ్వబడతాయి.
మిగిలినవి ప్రభుత్వ ఆసుపత్రులలో ఇన్-సర్వీస్ అభ్యర్థులకు ఇవ్వబడతాయి. కోవిడ్ మహమ్మారి సమయంలో ప్రభుత్వ ఆసుపత్రులలో పనిచేసిన కేర్ గివర్లకు ప్రాధాన్యత ఇవ్వాలని తెలంగాణ ప్రభుత్వం ఇప్పటికే విధానపరమైన నిర్ణయం తీసుకుంది.
ఆన్లైన్ దరఖాస్తు ఫీజు కింద రూ.200, ఎగ్జామినేషన్ ప్రాసెసింగ్ ఫీజు కింద రూ.120 చెల్లించాలి. ఆన్లైన్ పరీక్ష ఫీజుకు ఎలాంటి మినహాయింపు లేనప్పటికీ ఎస్సీ, ఎస్టీ, బీసీ, ఈడబ్ల్యూఎస్, పీహెచ్, మాజీ సైనిక ఉద్యోగుల నిరుద్యోగ దరఖాస్తుదారులకు ప్రాసెసింగ్ ఫీజు చెల్లింపునకు మినహాయింపు ఉంది. ఇతర రాష్ట్రాలకు చెందిన దరఖాస్తుదారులకు ఫీజు చెల్లించడానికి ఎటువంటి మినహాయింపు లేదు.
