వసూళ్ల వర్షం కురిపిస్తున్న 'కాంచన 2'... 'గంగ' విడుదలకు సిద్ధం..!
రాఘవ లారెన్స్ తాజా చిత్రం 'కాంచన 2' వసూళ్ల వర్షం కురిపిస్తోంది. సూపర్ హిట్ అయిన కాంచన సినిమాకి సీక్వెల్‌గా విడుదలైన 'కాంచన 2' సినిమా విశేషంగా ఆకట్టుకుంటోంది. తెలుగు వెర్షన్ 'గంగ' ఇంకా విడుదల కాలేదు. అయితే తమిళంలో మాత్రం ఈ సినిమా రికార్డులు సృష్టిస్తోంది.
పెద్ద హీరోల సినిమాలకి దీటుగా ఓపెనింగ్స్ వచ్చాయి. మాస్ ని విశేషంగా అలరించే ఎలిమెంట్స్ అన్నీ ఉండేలా చూసుకోవడం ఈ చిత్రం హిట్టు‌కు మరో కారణంగా తెలుస్తోంది. కేవలం ఫస్ట్ హాఫ్ ఒక్కటి చాలు.. కలెక్షన్స్ రాబట్టడానికి అంటున్నారు సినీ ప్రముఖులు.
కాగా తమిళంలో వస్తున్న స్పందన చూసి తెలుగు బయ్యర్లు ఎక్సయిట్ అవుతున్నారు. ఇన్నాళ్లు ఆర్ధికంగా ఇబ్బందుల వలన వాయిదా పడిన 'గంగ'ను ఏ రోజైనా విడుదల చేసేయమని, ముహూర్తాల కోసం చూడొద్దని బయ్యర్లు చెబుతున్నారు. అంటే తమిళంలో ఈ చిత్రం ఏ స్థాయిలో వసూళ్లను కుమ్మరిస్తుందో ఆలోచించుకోండి.
దీంతో వారంలోపు తెలుగులో విడుదల అయ్యే అవకాశం ఉన్నట్లు తెలుస్తోంది. అయితే అధికారికంగా విడుదల తేదీనలు ఖరారు చేయలేదని సమాచారం. మరి 'గంగ' తెలుగు ప్రేక్షకులను ఆకట్టుకుంటుందో లేదో వేచి చూడాలి.
