టీనేజ్ యువకుడితో అన్నారు... కానీ చిన్న పిల్లాడితో చేయమన్నారు... పూనమ్ ఆవేదన
సంచలనాల దర్శకుడు రామ్గోపాల్ వర్మ తెరకెక్కిస్తున్న చిత్రం 'శ్రీదేవి' లో ముఖ్యపాత్రని ప్రముఖ నటీ పూనమ్ కౌర్ పోషిస్తున్నారు. ఆ చిత్రానికి సంబంధించి షూటింగ్ కూడా ప్రారంభమైంది. రెండు రోజులు షూటింగ్ తర్వాత ఈ చిత్రం నుంచి తప్పుకుంటున్నట్లు హీరోయిన్ పూనమ్ కౌర్ ప్రకటించారని సమాచారం.
అందుకు కారణం కథ చెప్పిన సమయంలో టీనేజ్ కుర్రాడు అని చెప్పి... చిత్రంలో నటించే సమయంలో 10 ఏళ్ల వయస్సు గల ప్రణీత్ తో నటింప చేస్తున్నారని ఆవేదన వ్యక్తం చేసిందట. ఈ అంశంపై తీవ్ర మనస్తాపం చెందిన ఆమె ఈ చిత్రం నుంచి తప్పుకుంటున్నట్లు ప్రకటించారని సమాచారం. .
కాగా తొలుత రాంగోపాల్ వర్మ 'సావిత్రి' పేరుతో చిత్రాన్ని చేయనున్నట్లు ప్రకటించారు. అయితే సావిత్రి చిత్రం పేరుపై మహిళా సంఘాలు తీవ్ర వ్యతిరేకతను వ్యక్తం చేశాయి. దీంతో వర్మ 'సావిత్రి'ని పక్కన పెట్టి 'శ్రీదేవి' పేరును ఖరారు చేశాడు. ఆ చిత్రానికి శ్రీదేవి పేరు ఖరారు చేయడంపై ప్రముఖ నటీ శ్రీదేవి ఆగ్రహం వ్యక్తం చేసిన సంగతి తెలిసిందే.
శ్రీదేవి భర్త బోనీకపూర్ ఈ చిత్రం టైటిల్‌పై రామ్ గోపాల్ వర్మకు కోర్టు ద్వారా నోటీసులు ఇచ్చారు. అయితే తాను శ్రీదేవి పేరుతో చిత్రాన్ని నిర్మించి తీరుతానని వర్మ బహిరంగ ప్రకటన చేశారు. నటి శ్రీదేవికి ఈ టైటిల్ పాత్రకు ఎలాంటి లింకు లేదని తెలిపారు. ఓ టీచర్, ఓ విద్యార్థి మధ్య నడిచే కథనాన్ని ఇతివృత్తంగా తీసుకుని రామ్ గోపాల్ వర్మ శ్రీదేవి చిత్రాన్ని నిర్మిస్తున్నారు.
