బిడ్డకు జన్మనివ్వనున్న హీరోయిన్ ఇలియానా
ఒకపుడు స్టార్ హీరోయిన్‌గా వెలుగొందిన ఇలియానా ఇపుడు ఓ బిడ్డకు జన్మనివ్వనుంది. ఈ విషయాన్ని ఆమె స్వయంగా వెల్లడించారు. గర్భం దాల్చిన దగ్గర్నుంచి, ఓ బిడ్డకు జన్మనిచ్చేంత వరకూ ఉండే దశ... ఓ అపురూపమైన ప్రయాణం. అదెలా ఉంటుందో మాటల్లో చెప్పలేనని ఇలియానా అంటోంది. ఇప్పుడు తను కూడా ఓ బిడ్డకు తల్లికాబోతోంది. ఈ విషయాన్ని ఇటీవలే సోషల్ మీడియా ద్వారా తెలియపరిచింది.
ఇప్పుడు బేబీ బంప్‌తో ఉన్న ఓ ఫొటోని సోషల్ మీడియాలో పోస్ట్ చేసి... "తల్లికావడం ఓ అద్భుతమైన అనుభూతి, మాటల్లో వర్ణించలేనిది. ఈ క్షణాల్ని ఆస్వాదిస్తున్నా. నాలో ఓ జీవి ప్రాణం పోసుకొంటుందన్న ఊహే అపురూపంగా అనిపిస్తోంది. నా బిడ్డ బయటకు వచ్చాక తనని ఎంత ప్రేమిస్తానో, ఎలా
చూసుకొంటానో నాకు తెలీదు. కానీ ఇప్పటికైతే అమితంగా ఇష్టపడుతున్నా" అంటూ ఓ ఉద్వేగభరితమైన పోస్ట్ పెట్టింది.
"ఈమధ్య కొన్ని కష్టమైన రోజులు గడిచాయి. ఆ పరిస్థితులు నన్ను గందరగోళానికి గురిచేశాయి. అయితే వాటి నుంచి నేను క్రమంగా బయటపడ్డా. ఆ క్షణంలో తను నా చెంత ఉన్నాడు, నా కన్నీళ్లు తుడిచాడు, నా జీవితంలో చిరునవ్వులు పూయించాడు" అంటూ తన ప్రియుడి గురించి ఆసక్తికరమైన వ్యాఖ్యలు చేసింది. ఈ పోస్ట్ ఇప్పుడు నెట్టింట వైరల్‌గా మారింది.
