కుమ్మేస్తున్న ఎఫ్2.. అంతేగా...
సంక్రాంతికి వచ్చిన రామ్ చరణ్, బాలకృష్ణ సినిమాలు బాక్సాఫీస్ వద్ద చతికిలపడగా, ఆ వెంటనే వెంకీ-వరుణ్ తేజ్ కాంబినేషన్‌లో వచ్చిన ఎఫ్2 రికార్డులను కొల్లగొడుతోంది. మొదటి రెండు వారాలు కలెక్షన్ల మోత మోగించగా, మూడో వారం కూడా ఏ మాత్రం తగ్గకుండా కలెక్షన్లు రాబడుతోంది. మజ్ను సినిమా విడుదలైనా కూడా కలెక్షన్లు ఏమాత్రం తగ్గకపోవడం గమనార్హం.
ఇప్పటికే 16 రోజుల్లో 71 కోట్లు రాబట్టిన ఎఫ్2 అతి త్వరలోనే 80 కోట్ల మార్కును దాటి ఇండస్ట్రీలో సూపర్ స్టార్ల రికార్డులను సులభంగా దాటేలా కనిపిస్తోంది. మగధీర కలెక్షన్లు 73 కోట్లు, అత్తారింటికి దారేది 74 కోట్లకు చాలా చేరువలో ఉంది. మరొక వారం పాటు కలెక్షన్లు ఇలాగే కొనసాగితే ఈ రికార్డులను అధిగమించి 80 కోట్ల క్లబ్‌లో అడుగుపెట్టినా కూడా ఆశ్చర్యపోనక్కర్లేదు. ఏదేమైనా వెంకీ-వరుణ్ తేజ్ కాంబో అద్భుతంగా పని చేసిందనే చెప్పాలి.
