పెళ్లికి సమయం - వయసుతో పనిలేదంటున్న బాలీవుడ్ భామ
బాలీవుడ్ భామ పరిణీతి చోప్రా తన ప్రేమ, పెళ్లికి సంబంధించిన ప్రశ్నలతో విసిగిపోయిందో ఏమో కానీ మీడియాకి కొంచెం ఘాటుగానే సమాధానమిచ్చారు. వివరాలలోకి వెళ్తే... పరిణీతి చోప్రా ప్రస్తుతం అక్షయ్‌ కుమార్‌‌కి జోడీగా నటిస్తున్న ‘కేసరి’ సినిమా ప్రచారంలో కాస్త బిజీగానే ఉంది. ఇది 1897లో జరిగిన సారాగడీ యుద్ధంలో పదివేల మంది ఆప్ఘన్‌లతో పోరాడిన 21 మంది సిక్కు సైనికుల నేపథ్యంలో సాగే చిత్రం. ఈ నెల 21న సినిమా విడుదల కాబోతున్న ఈ చిత్ర ప్రచారంలో భాగంగా పరిణీతి ఒక ఇంటర్వ్యూ ఇచ్చారు.
ఈ సందర్భంగా ఇటీవల దర్శకుడు మనీష్‌ శర్మతోనూ, గతంలో సహాయ దర్శకుడు చరిత్‌ దేశాయ్‌తోనూ ప్రేమలో ఆవిడ ఉన్నట్లు వచ్చిన వార్తల గురించి ఆవిడని ప్రశ్నించడం జరిగింది. ఆ ప్రశ్నలకు స్పందించిన పరిణీతి.. ‘నిజంగా చెబుతున్నా.. నా ప్రేమ జీవితం గురించి మాట్లాడేందుకు నేను సిద్ధంగా లేను. ఇది సరయిన సమయం కాదు. ఆ విషయం ఎప్పుడు అందరికీ తెలియాలో అప్పుడే నా నుంచి తెలుస్తుంది. నేను అన్నీ దాస్తుంటాను అనేది చాలా మంది అభిప్రాయం.
కానీ అది నిజం కాదు. జీవితంలో ప్రేమకు చాలా ఎక్కువ ప్రాధాన్యత ఉంటుంది. అన్నీ కుదిరినప్పుడు పెళ్లి చేసుకుంటా. వివాహానికి సమయం, వయసుతో పనిలేదు. అది ఓ వ్యక్తి మెంటల్‌ స్టేట్ మీద ఆధారపడి ఉంటుంది. నా మానసిక పరిస్థితి పెళ్లికి సిద్ధంగా ఉంటే.. రేపే నా పెళ్లి జరగొచ్చు. లేకపోతే మరో ఐదేళ్లు ఇలానే ఉండొచ్చు’ అంటూ చెప్పుకొచ్చారు. మరి ఈ ఊహాగానాలు ఇకనైనా ఆగుతాయో లేదో... చూద్దాం.
