రుద్రమదేవి హిందీ ట్రైలర్ రిలీజ్: అక్టోబర్ 9న వస్తోన్న కాకతీయ వీరనారి
కాకతీయ వీరనారి రాణి రుద్రమదేవి ఘనతను ప్రపంచానికి చాటిచెప్పే ఉద్దేశంతో భారీ చిత్రాల దర్శకుడు గుణశేఖర్ రుద్రమదేవి సినిమాను తెరకెక్కించారు. ఇటీవలే ఈ సినిమా ఆడియో, ట్రైలర్లను రిలీజ్ చేశారు. ఆడియో, ట్రైలర్లను మంచి స్పందన వచ్చింది. రుద్రమదేవిగా అనుష్క నటిస్తున్న ఈ సినిమా అక్టోబర్ 9వ తేదీన రిలీజ్ కానుంది. హిందీ వెర్షన్ సైతం అదే రోజు రిలీజ్‌కు సిద్ధమవుతోంది. రిలయన్స్ వారు హిందీలో ఈ చిత్రాన్ని అందిస్తున్నారు.
తాజాగా హిందీ వెర్షన్ ట్రైలర్‌ని విడుదల చేసారు. ఈ ట్రైలర్ చూసిన వారు సూపర్‌గా ఉందని మెచ్చుకుంటున్నారు. కచ్చితంగా హిందిలో మంచి ఓపినింగ్స్ వస్తాయని భావిస్తున్నారు. భారతదేశపు తొలి స్టీరియోస్కోపిక్‌ త్రీడీ ద్విభాషా చిత్రమిది కావడం విశేషం. ప్రస్తుతం నిర్మాణానంతర కార్యక్రమాలు జరుగుతున్నాయి. తుది దశ వీఎఫ్‌ఎక్స్‌ పనులు చేపడుతున్నారు.
ఈ కథలో ప్రధాన పాత్రల్లో ఒకటైన మహామంత్రి 'శివదేవయ్య' పాత్రను ప్రముఖ నటుడు ప్రకాష్ రాజ్‌ పోషించారు. దర్శకనిర్మాత మాట్లాడుతూ '' సాంకేతికంగా సినిమాని ఉన్నతంగా తీర్చిదిద్దేందుకు మరి కొంత సమయం తీసుకుంటున్నాం. ప్రస్తుతం విజువల్‌ ఎఫెక్ట్స్‌ పనులు దేశవిదేశాల్లో చేపడుతున్నాం. తమిళ, తెలుగు భాషల్లో రూపొందిన ఈ చిత్రం అన్ని వర్గాల ప్రేక్షకుల్నీ మెప్పించేలా ఉంటుందని వ్యాఖ్యానించారు.
