శ్రేయా ఘోషల్‌కి చేదు అనుభవం... విలువైన వాయిద్య పరికరాలుంటే?
ప్రస్తుతం భారతదేశంలో ప్రముఖ గాయనిగా తనకంటూ ప్రత్యేక స్థానాన్ని సంపాదించుకున్న శ్రేయా ఘోషల్‌కు చేదు అనుభవం ఎదురైంది. సింగపూర్ బయలుదేరిన శ్రేయ తనతో పాటు ఓ వాయిద్య పరికరాన్ని కూడా తీసుకువచ్చారు.
అయితే ఇందుకు సింగపూర్ ఎయిర్లైన్స్ సిబ్బంది ఒప్పుకోలేదు. వాయిద్య పరికరాన్ని విమానంలోకి తీసుకురాకూడదని చెప్పారు. దాంతో తప్పని పరిస్థితుల్లో శ్రేయ తన పరికరాన్ని విమానాశ్రయంలోనే విడిచిపెట్టి వెళ్లిపోయింది.
ఈ విషయమై సింగపూర్ ఎయిర్లైన్స్ సంస్థ పట్ల శ్రేయ తన అసంతృప్తిని ట్విట్టర్ ద్వారా వ్యక్తం చేసింది. సింగపూర్ ఎయిర్లైన్స్ సంస్థ మ్యూజీషియన్స్ వద్ద విలువైన వాయిద్య పరికరాలుంటే విమానంలోకి ఎక్కనివ్వదేమో..! మంచిది. ధన్యవాదాలు, తనకు గుణపాఠం చెప్పారు అంటూ పేర్కొన్నారు. ఈ ట్వీట్ చూసిన ఎయిర్లైన్స్ సంస్థ శ్రేయకు క్షమాపణలు చెప్పింది.
శ్రేయా..మీ పట్ల ఇలా జరిగినందుకు చింతిస్తున్నాం. అసలు ఏమి జరిగింది మరియు మా సిబ్బంది మీతో ఏమన్నారో కాస్త వివరంగా చెప్పగలరా అని కోరారు. ఈ ఘటనపై శ్రేయకు అభిమానుల నుండి మద్దతు లభించింది. విషయం ఎంతో సీరియస్ అయితే గానీ ఆమె ఇలా ట్వీట్ చేయరంటూ అభిమానులు ఎయిర్‌లైన్స్‌పై కామెంట్‌లు చేస్తున్నారు.
