'కబాలి' హిట్టా.. ఫట్టా అనేది ప్రేక్షకులే తేల్చాలి.. వివాదం వద్దు : గేయ రచయిత వైరముత్తు
తమిళ సూపర్ స్టార్ రజినీకాంత్ తాజా చిత్రం 'కబాలి'. ఈ చిత్రం ఈనెల 22వ తేదీన ప్రపంచ వ్యాప్తంగా విడుదల కాగా, మిశ్రమ స్పందన లభించింది. అయితే, కలెక్షన్లపరంగా దుమ్ము రేపుతోంది.
తమిళ సూపర్ స్టార్ రజినీకాంత్ తాజా చిత్రం 'కబాలి'. ఈ చిత్రం ఈనెల 22వ తేదీన ప్రపంచ వ్యాప్తంగా విడుదల కాగా, మిశ్రమ స్పందన లభించింది. అయితే, కలెక్షన్లపరంగా దుమ్ము రేపుతోంది. అయితే, ఈ చిత్రం పరాజయం పాలైనట్టు జోరుగా ప్రచారం సాగుతోంది. ముఖ్యంగా తెలుగులో ఇప్పటికే నెగెటివ్ టాక్‌ను సొంతం చేసుకుంది. అలాగే, తమిళంలో కూడా రజినీ అభిమానులు సైతం పెదవి విరుస్తున్నారు.
ఈ పరిస్థితుల్లో సినీ గేయరచయిత వైరముత్తు ఇటీవలే ఓ ప్రైవేట్ కార్యక్రమంలో ప్రసంగిస్తూ ‘కబాలి’ పరాజయాన్ని మనం అంగీకరించాలి అన్నట్టు అర్థం వచ్చేలా వ్యాఖ్యానించారు. ఈ వ్యాఖ్యలపై రజనీ అభిమానులు తీవ్ర అభ్యంతరం వ్యక్తం చేస్తున్నారు. ఇండస్ట్రీలో కూడా ఈ వాఖ్యలపై తీవ్ర చర్చ జరుగుతోంది.
దీంతో వైరముత్తు మంగళవారం సాయంత్రం ఒక పత్రికా విడుదల చేస్తూ... ‘కబాలి’పై తాను చేసిన వ్యాఖ్యలకు చింతిస్తున్నానని, దయచేసి ఈ విషయాన్ని వివాదం చేయొద్దని విజ్ఞప్తి చేశారు. ‘కబాలి’ చిత్రం విజయవంతమైందా? లేదా? అన్నది అందరూ అర్థం చేసుకోవాలని తాను పేర్కొంటే, అందులో ఆ చిత్రం పరాజయమైనట్లు తాను పేర్కొనట్లు తప్పుగా అర్థం చేసుకున్నారన్నారు. తాను ఎంతగానో అభిమానించే రజినీకాంత్ చిత్రం గురించి ఈ విధంగా వ్యాఖ్యానించడంపై చింతిస్తున్నట్టు చెప్పారు. పైగా, తాను చేసిన వ్యాఖ్యలపై రజినీకి కూడా వివరణ ఇచ్చినట్టు చెప్పారు.
