బాహుబలి ఆడియో విడుదలకు భారీ ఏర్పాట్లు... పర్యవేక్షించిన రాజమౌళి
బాహుబలి చిత్రం ఆడియో విడుదలకు తిరుపతి వేదికగా మారింది. ఇక్కడున్న ఎస్వీయుకు చెందిన తారక రామస్టేడియంను అంగరంగవైభవంగా తీర్చిదిద్దారు. చిత్ర దర్శకుడు రాజమౌళి ఏర్పాట్లను పర్యవేక్షించారు. శుక్రవారమే తిరుపతి చేరుకున్న ఆయన ఉదయం నుంచే సినీ ప్రముఖుడు ఎన్వీ ప్రసాద్ తో కలసి స్టేడియంలో ఏర్పాట్లను పర్యవేక్షించారు.
భారీ బడ్జెట్‌తో తెరకెక్కుతున్న చిత్రం బాహుబలి’. ఎస్.ఎస్.రాజమౌళి దర్శకత్వంలో రూపొందిన ఈ చిత్ర ఆడియో వేడుక శనివారం తిరుపతిలో జరగనుంది. స్వాగత తోరణాలు, ఆడియో విధానం వంటివి ఇప్పటికే ఏర్పాటయ్యాయి. స్టేజీ, కుర్చీల ఏర్పాటు వంటివి ప్రత్యేకంగా ఏర్పాటు చేశారు. దర్శకుడు రాజమౌళి మైదానమంతా కలియతిరిగి అణువణువును పరిశీలించారు.
ప్రభాస్ టైటిల్ రోల్ పోషించిన ఈ చిత్రంలో రానా, అనుష్క, తమన్నా ప్రధాన పాత్రల్లో నటించారు. కె.రాఘవేంద్రరావు బి.ఎ. సమర్పణలో శోభు యార్లగడ్డ, ప్రసాద్ దేవినేని ఈ చిత్రాన్ని నిర్మిస్తున్నారు. బాహుబలి ఆడియో రైట్స్ ప్రముఖ లహరి సంస్థ దక్కించుకుంది. రెండు భాగాలుగా రూపొందుతున్న ఈ చిత్రం మొదటి భాగం 'బాహుబలి- ద బిగినింగ్' పేరుతో విడుదల కానుంది.
