తమిళనాడు వ్యాప్తంగా వైద్య ఏటీఎంలు
చెన్నైలోని ఆస్పత్రుల్లో ఏటీఎం యంత్రాలు కన్పిస్తున్నాయి. ఇందులో కొత్తేముంది అనుకుంటున్నారు కదా. ఏటీఎంలు అంతటా ఉంటాయి కదా అని అనుకుంటున్నారు కదా. అయితే అవి మీరు అనుకుంటున్నట్లుగా డబ్బులు డ్రా చేసే ఏటీఎంలు కాదు. ఎనీ టైమ్ మనీ ఏటీఎంలు కావు… ఎనీటైమ్‌ మెడిసిన్‌ ఏటీఎంలు. ప్రభుత్వం నిర్వహిస్తున్న 23 మెడికల్ కాలేజీ ఆస్పత్రులు, పట్టణ ప్రాథమిక ఆరోగ్య కేంద్రాలతో పాటూ, మొత్తం 32 ప్రాంతాల్లో ఇలాంటి ఏటీఎంలను ఏర్పాటు చేసింది.
ఈ యంత్రం ద్వారా టీబీ, డయాబెటిస్‌, హైపర్‌ టెన్షన్‌ వంటి 32 రకాల జబ్బులకు సంబంధించిన మందులు పొందవచ్చు. మెడికల్ షాపుల ముందు లైనులో నిలబడే పనిలేకుండా ఈ ఏటఎంల ద్వారా అత్యంత త్వరగా, తేలిగ్గా కావాల్సిన మందులను పొందేందుకు అవకాశముంది. మనకు కావాల్సిన మెడికల్ ప్రిస్క్రిప్షన్‌లో క్యూఆర్‌ కోడ్‌ ఉంటుంది.
మందులు కావాలనుకునే వారు ఈ కోడ్‌ని మిషన్‌కు చూపించాల్సి ఉంటుంది. ఆ కోడ్‌ని స్కాన్‌ చేసి ఎన్ని మందులు కావాలో అడుగుతుంది. ఎంత డబ్బు అవుతుందో చెబుతోంది. ఆ డబ్బు ఇవ్వగానే వెంటనే మందులు ఇచ్చేస్తుంది. ఈ ఏటీఎంకు రూ.80 లక్షలు ఖర్చు పెట్టి ప్రభుత్వం 32 మిషన్‌ను ఏర్పాటు చేసినట్లు ఆ రాష్ట్ర సీఎం పళనిస్వామి తెలిపారు. ప్రభుత్వం ఇస్తున్న ఉచిత మందులను కూడా ఈ ఏటీఎంల ద్వారా కూడా పొందవచ్చని తెలిపారు.
