హార్డ్‌వేర్ ఇంజనీర్లను చుక్కలు చూపుతున్న గూగుల్..
గూగుల్ సంస్థలో పనిచేసే హార్డ్‌వేర్ ఇంజనీర్‌లకు గడ్డుకాలమేనట. ఈ విషయాన్ని బిజినెస్‌ ఇన్‌సైడర్‌ పత్రిక వెల్లడించింది. గూగుల్ సంస్థ తన ల్యాప్‌టాప్, టాబ్లెట్ విభాగాల్లో పనిచేసే హార్డ్‌వేర్ ఇంజనీర్లను ఇతర విభాగాల్లోకి మార్చేయనుంది. ఈ విషయాన్ని ఆ సంస్థే వారికి కూడా వెల్లడించింది. దీని వలన గూగుల్ హార్డ్‌వేర్ వ్యాపారంపై పలు సందేహాలు తలెత్తుతున్నాయి.
గూగుల్ సంస్థ క్రియేట్ బృందాన్ని తగ్గించుకోవడం కోసం చేసే ప్రయత్నాలలో భాగంగా ఈ చర్యలు చేపట్టింది. ప్రస్తుతం ఈ బృందం పిక్సెల్ బుక్ ల్యాప్‌టాప్, పిక్సెల్ స్లేట్ టాబ్లెట్, ఇతర ఉత్పత్తులను తయారు చేస్తోంది.
ఈ బృందంతో పాటుగా మిగిలిన హార్డ్‌వేర్ బృందాలు సైతం పిక్సల్‌ స్మార్ట్‌ఫోన్లను, హోమ్‌ స్మార్ట్‌ స్పీకర్లను తయారు చేస్తున్నాయి. ప్రస్తుతం వ్యాపారంలోని కొన్ని విభాగాలను తగ్గించుకునే యోచనలో గూగుల్ ఉన్నట్లు విశ్లేషకులు అంచనా వేస్తున్నారు. దీనిపై గూగుల్ ఎలాంటి అధికారిక ప్రకటన చేయలేదు.
