ఇకపై టెస్ట్ డ్రైవింగ్ అక్కర్లేదు... ఆ స్కూల్ ట్రైనింగ్ ఉంటేచాలు...
కేంద్ర ప్రభుత్వం మరో కీలక నిర్ణయం తీసుకుంది. డ్రైవింగ్ లైసెన్స్ కోసం ప్రాంతీయ రవాణా కార్యాలయా(ఆర్టీవో)ల్లో టెస్ట్ డ్రైవింగ్ అక్కర్లేదని స్పష్టం చేసింది. అయితే, అధీకృత డ్రైవింగ్ స్కూళ్లలో శిక్షణ పూర్తిచేసుకుని, సర్టిఫికెట్‌ పొందితే చాలని తెలిపింది.
ఈ సర్టిఫికేట్ ఆధారంగా టెస్ట్ లేకుండా డ్రైవింగ్ లైసెన్సు పొందవచ్చని తాజాగా వెల్లడించింది. ఈ విషయాన్ని కేంద్రం అధీకృత డ్రైవింగ్ స్కూళ్లకు శుక్రవారం విడుదల చేసిన మార్గదర్శకాలు స్పష్టం చేస్తున్నాయి.
అయితే.. ఆర్టీయే నుంచి లైసెన్సులు పొందిన అధీకృత డ్రైవింగ్ స్కూళ్లు వాహనాల శిక్షణ కోసం సిమ్యులేటర్లను సమకూర్చుకోవడం.. కనీసం ఎకరా స్థలానికి తగ్గకుండా టెస్టింగ్‌ ట్రాక్‌లను ఏర్పాటు చేసుకోవడం వంటి మార్గదర్శకాలను పాటించాల్సి ఉంటుంది.
డ్రైవింగ్ స్కూల్‌లో నిర్వహించే టెస్టు వివరాలను ఆన్‌లైన్‌లో సమర్పించి, శిక్షణ తీసుకున్న వారికి సర్టిఫికెట్లు ఇస్తారు. వాటిని ఆర్టీయే కార్యాలయాల్లో డ్రైవింగ్ లైసెన్సు దరఖాస్తుతో జతచేస్తే సరిపోతుంది. ఎలాంటి టెస్టు లేకుండానే డ్రైవింగ్ లైసెన్స్ జారీ అవుతుందని పేర్కొంది.
