ఫ్లాట్‌లో రేవ్ పార్టీ: 39మంది కళాశాల విద్యార్థులు, మైనర్లు అరెస్ట్
ఉత్తరప్రదేశ్‌లోని ఒక ఫ్లాట్‌లో ‘రేవ్ పార్టీ’పై పోలీసులు దాడి చేసిన తర్వాత 39 మంది కళాశాల విద్యార్థులను, కొంతమంది మైనర్‌లను అదుపులోకి తీసుకున్నట్లు అధికారులు తెలిపారు. నోయిడా సెక్టార్-39లోని సూపర్‌నోవా రెసిడెన్షియల్ సొసైటీలో 'రేవ్ పార్టీ' గురించి శుక్రవారం రాత్రి సమాచారం అందిందని పోలీసులు తెలిపారు.
ఈ క్రమంలో నోయిడాకు చెందిన ఓ విశ్వవిద్యాలయానికి చెందిన 39 మంది విద్యార్థులను అదుపులోకి తీసుకున్నట్లు అధికారి తెలిపారు. అదుపులోకి తీసుకున్న విద్యార్థుల వయస్సు 16 నుంచి 20 ఏళ్ల మధ్య ఉంటుందని పోలీసులు తెలిపారు.
పార్టీ నుండి పెద్ద సంఖ్యలో హర్యానా లేబుల్ మద్యం సీసాలు, హుక్కాలు, ఇతర వస్తువులను స్వాధీనం చేసుకున్నట్లు అధికారి తెలిపారు. విచారణలో, వాట్సాప్‌లో పార్టీ కోసం విద్యార్థులను ఆహ్వానించినట్లు తేలింది. ప్రవేశ రుసుము ఒక్కొక్కరికి రూ. 500, జంటకు రూ. 800 తీసుకున్నట్లు వెల్లడి అయ్యింది. ఈ ఘటనపై కేసు నమోదు చేసుకున్న పోలీసులు దర్యాప్తు జరుపుతున్నారు.
