తిత్లీ తుఫాను బాధితుల‌కు జీవిత-రాజశేఖర్ రూ.10 ల‌క్ష‌లు విరాళం
ప్ర‌కృతి మాన‌వుడిపై క‌న్నెర్రజేసిన ప్ర‌తిసారీ మ‌నిషికి మ‌నిషే తోడుగా నిల‌బ‌డుతున్నాడు. ఇది చాలా సందర్భాల్లో నిరూప‌ణ అయ్యింది. ఇటీవ‌ల తిత్లీ తుపాను కారణంగా శ్రీకాకుళం జిల్లాలోని 165 గ్రామాలు స‌మ‌స్య‌ల్లో చిక్కుకున్నాయి. జ‌న జీవ‌నం అస్త‌వ్య‌స్థ‌మైంది. ఆస్థి న‌ష్టం ఎక్కువ‌గా జ‌రిగింది.
ప్రభుత్వం త‌గు చ‌ర్య‌లు తీసుకుంటున్నా.. త‌మవంతుగా సినీ ప‌రిశ్ర‌మ బాధితుల‌కు ఆప‌న్న హస్తాన్ని అందించ‌డానికి ముందుకు వ‌చ్చింది. అందులో భాగంగా హీరో రాజశేఖర్, ఆయన స‌తీమ‌ణి జీవిత తుఫాను బాధితుల‌కు రూ.10 ల‌క్ష‌లు విరాళాన్ని అందించారు.
ఆంధ్రప్రదేశ్ ముఖ్యమంత్రి నారా చంద్ర‌బాబు నాయుడుని అమ‌రావ‌తిలోని ఆయన స్వ‌గృహంలో నేరుగా క‌లుసుకుని రూ.10 ల‌క్ష‌ల చెక్‌ను ఆయ‌న‌కు అందించారు.
