భార్య మెసేజ్‌లను ట్రాక్ చేయడానికి యాప్.. లాడ్జికి రమ్మని చంపేశాడు..

first love
సందీప్| Last Updated: గురువారం, 14 ఫిబ్రవరి 2019 (12:40 IST)
ప్రేమించి పెళ్లిచేసుకున్నారు, పెళ్లైన నాలుగు రోజులకే దుబాయి వెళ్లాడు. కానీ కొద్ది రోజులకే తిరిగి వచ్చాడు. ఇంటి తలుపు తట్టడంతో ఆలస్యంగా తలుపు తీసింది. ఆనుమానం పెంచుకున్నాడు. అది భార్య హత్యకు దారితీసింది. అంతే కాకుండా తానే హత్య చేసానని పోలీసులకు ఫోన్ చేసి చెప్పాడు. వివరాల్లోకి వెళితే గద్వాల్‌కు చెందిన రఫీ(34) సికింద్రాబాద్‌ లాలాగూడలోని రైల్వే క్వార్టర్‌కు చెందిన నఫీజ్‌ బేగం(24) ప్రేమించుకున్నారు.
 
వివాహం జరిగిన నాలుగు రోజుల తర్వాత రఫీ దుబాయ్ బయలుదేరాడు. జనవరి మొదటి వారంలో భార్యకు చెప్పకుండా లాలాగూడలోని ఇంటికి వచ్చాడు. తలుపు తట్టాడు. భార్య ఆలస్యంగా తలుపు తీయడంతో అప్పటి నుండి అనుమానం పెంచుకున్నాడు. నిఘా పెట్టాలని నిర్ణయించుకున్నాడు, భార్య మెసేజ్‌లను ట్రాక్ చేయడానికి ఒక యాప్‌ని ఉపయోగించాడు. 
 
వారం రోజుల తర్వాత మళ్లీ దుబాయ్ వెళ్లిపోయాడు. భార్య పంపే సందేశాలను అక్కడ ఆ యాప్ ద్వారా ట్రాక్ చేసేవాడు. కానీ ఈ నెల 12వ తేదీ సాయంత్రం మళ్లీ భార్యకు చెప్పకుండా లాలాగుడకు వచ్చాడు. ఇద్దరూ కొద్దిసేపు మాట్లాడుకున్నారు. ఎందుకో వారిద్దరి మధ్య గొడవ జరిగింది. రఫీ అక్కడ నుండి వెళ్లి సికింద్రాబాద్‌ గురుద్వార సమీపంలో గల లోటస్‌ గ్రాండ్‌ లాడ్జిలో రూమ్ నంబర్ 502 బుక్ చేసుకున్నాడు. రాత్రి అతనికి భార్య ఫోన్ చేసింది. మాట్లాడాలని, కలవాలని చెప్పింది. లాడ్జీకి రమ్మని చెప్పాడు. 
 
ఆ రాత్రే ఆమె భార్తను కలిసేందుకు లాడ్జీకి వెళ్లింది. లోటస్‌ గ్రాండ్‌ లాడ్జిలో భార్యను చంపేశానంటూ గోపాలపురం పోలీసులు, కంట్రోల్‌ రూమ్‌కు ఫోన్‌ చేసి సమాచారం అందించాడు. దాంతో పోలీసులు ఘటనా స్థలానికి చేరుకున్నారు. అక్కడే ఉన్న రఫీని అదుపులోకి తీసుకుని స్టేషన్‌కు తరలించారు. నఫీజ్‌ బేగం మృతదేహాన్ని పోస్ట్‌మార్టం నిమిత్తం గాంధీ ఆసుపత్రికి పంపించారు. 
 
విషయం తెలుసుకున్న తల్లిదండ్రులు, బంధువులు బుధవారం 11 గంటలకు పోలీస్‌స్టేషన్‌కు చేరుకున్నారు. దుబాయ్‌లో కారు డ్రైవర్‌గా పనిచేస్తున్న రఫీ ఈ ఏడాది జనవరిలో నగరానికి వచ్చి తిరిగి వెళ్లిపోవటానికి కారణం ఏమిటి, ఆమెను ఎందుకు చంపవలసి వచ్చింది అనే కోణంలో పోలీసులు దర్యాప్తు చేస్తున్నారు. వివాహేతర సంబంధం ఉందని అనుమానించి ఈ పని చేసాడని పోలీసులు ఆరా తీస్తున్నారు. కానీ ఏ యాప్ ఉపయోగించాడో చెప్పడంలేదని పోలీసులు వెల్లడించారు.



దీనిపై మరింత చదవండి :