విరాట్ కోహ్లీ నిర్ణయం చాలా గొప్పది : ద్రావిడ్ ప్రశంసలు
భారత వన్డే క్రికెట్ జట్టు కెప్టెన్ విరాట్ కోహ్లీపై క్రికెట్ దిగ్గజం రాహుల్ ద్రావిడ్ ప్రశంసల వర్షం కురిపించారు. శ్రీలంకతో కీలక సిరీస్‌కు ముందు సన్నద్ధత కోసం ఇండియా -ఎ జట్టు తరపున ఆడాలని కోహ్లీ నిర్ణయించుకోవడాన్ని భారత ఏ క్రికెట్ జట్టు కోచ్‌గా ఉన్న ద్రావిడ్ ప్రశంసించాడు. అది గొప్ప నిర్ణయం. అద్భుతమైన నిర్ణయమన్నాడు.
కోహ్లీ నిర్ణయంపై ద్రావిడ్ స్పందిస్తూ మూడు వారాల కిందట కోహ్లీ నాతో మాట్లాడాడు. ఆసీస్-ఎ జట్టుతో సిరీస్ సందర్భంగా కనీసం ఒక మ్యాచ్ లోనైనా ఆడే చాన్స్ ఇవ్వాలని కోరాడు. శ్రీలంక టూర్ కోసం తనను తాను సిద్ధం చేసుకోవాలన్న తపన అతడిలో కనిపిస్తోంది. ఆట పట్ల అతడి అనురక్తికి ఇది నిదర్శనం.
మరింత మ్యాచ్ ప్రాక్టీసు ఉంటే లంకతో సిరీస్‌లో రాణించగలనన్న ఉద్దేశంతోనే కోహ్లీ ఈ నిర్ణయం తీసుకున్నట్టున్నాడు అని కితాబిచ్చారు. కోహ్లీని ఆకట్టుకునేందుకు యువ ఆటగాళ్లకు ఇదో చక్కని అవకాశమని భావిస్తున్నా. కోహ్లీ ముందే తమ ప్రతిభను చాటుకునే మెరుగైన అవకాశం వారి ముందు నిలిచింది అని ద్రావిడ్ అభిప్రాయపడ్డారు.
