నా ప్రేయసిని ఈ కత్తితో చంపా... కొంటారా...? కత్తిని అమ్మకానికి పెట్టిన ప్రియుడు
తన ప్రియురాలిని కత్తితో అతిదారుణంగా హతమార్చి ఆపైన కత్తిని సోషల్ మీడియాలో పోస్టు చేశాడో ప్రేమ పిశాచి. 'ఒకరిని ముక్కలు ముక్కలుగా చేసేందుకు ఒక్కసారి మాత్రమే ఈ కత్తిని ఉపయోగించాను. ఇది ఇప్పటికీ కొత్తదే తళతళ మెరిసిపోతుంది చూడండీ. దీనిని ఎవరైనా కొంటారా? అంటూ ఫేస్బుక్లో పోస్టు పెట్టాడు. ఈ కిరాతకుడికి (40 ఏళ్ల బ్రియాన్ బ్రిమేజర్)కు అమెరికా కోర్టుకు 26 ఏళ్ల శిక్ష విధించింది.
ఈ వివరాలను పరిశీలిస్తే... కాలిఫోర్నియాకు చెందిన ఈ ప్రబుద్ధుడు తన ప్రియురాలైన 42 ఏళ్ల యోన్నెలీ బాల్డెలీతో పనామాలో 2 నెలలపాటు కలిసి జీవించాడు. ఏమైందో ఏమోగానీ అతికిరాతకంగా పొడిచి చంపాడు. ఆ తర్వాత ఆమె దేహాన్ని ముక్కముక్కలు చేసి పనామాలోని ఓ దీవిలో పడేశాడు. గతంలో సాన్డియాగోలో నావికుడిగా పనిచేసిన అతను హత్య చేసిన వెంటనే తన స్నేహితుడికి ఓ ఈమెయిల్ కూడా పంపాడు. పనామాలో తాను ఆనందభరితమైన జీవితాన్ని గడుపుతున్నట్టు ఆ ఈమెయిల్లో సందేశం పంపాడు.
2013లో పనామా వాసులు ఓ మహిళ అస్తిపంజరాన్ని గుర్తించడంతో అతడు చేసిన దారుణం వెలుగులోకి వచ్చింది. పనామా వాసులు పోలీసులకు సమాచారం అందించారు. పోలీసులు ఈ కిరాతకుడిని అరెస్టు చేసి కోర్టులో హాజరుపరిచారు. కోర్టు విచారణలో అతడు నేరం అంగీకరించి.. యోన్నెలి కుటుంబసభ్యులకు క్షమాపణలు చెప్పాడు. అయితే ఈ కిరాతకుడిని క్షమించవద్దని, కఠినంగా శిక్షించాలని బాధితురాలు యోన్నెలీ కుటుంబసభ్యులు కోరారు. దీంతో కోర్టు అతడికి 26 ఏళ్ల కఠిన కారాగార శిక్ష విధించింది.