ఆదివారం సెలవు ఇవ్వలేదనీ రూ.152 కోట్ల అపరాధం... ఎక్కడ?
ఓ మహిళా ఉద్యోగినికి ఆదివారం సెలవు ఇవ్వకుండా పని చేయించుకున్నందుకు కంపెనీకి రూ.152 కోట్ల అపరాధం విధిస్తూ ఓ కోర్టు తీర్పునిచ్చింది. ఈ తీర్పు అమెరికాలోని ఫ్లోరిడా రాష్ట్రంలోని ఓ కోర్టు వెలువరించింది. ఈ వివరాలను పరిశీలిస్తే,
హైతీ దేశానికి చెందిన మేరీ అనే ఓ మహిళ ఫ్లోరిడాలోని మియామీకి వలస వచ్చింది. అక్కడే ఉన్న ఓ నక్షత్ర హోటల్‌లో పనిలో చేరింది. ఆమె విధుల్లో చేరిన కొత్తల్లో ఆదివారం సెలవు ఇచ్చింది. హోటల్‌లో ఆరు రోజులు, చర్చిలో ఆదివారం పని చేస్తూ పోషణ సాగిస్తూ వచ్చింది.
ఆ తర్వాత హోటల్ కిచెన్ మేనేజరుగా వచ్చిన కొత్త వ్యక్తి ఆ మహిళకు ఆదివారం సెలవును రద్దు చేసి.. పనికి రావాలంటూ ఆదేశించారు. ఆదివారం పనిచేయడం తమ మతాన్ని అగౌరవించినట్లు అవుతుందని మేరి చర్చి ఫాదర్ చేత లేఖ రాయించారు.
అయినప్పటికీ ఆ మేనేజరు అంగీకరించకుండా పనికి రప్పించుకునేవాడు. దీంతో దాదాపు పదేళ్ల పాటు ఆ మహిళ సెలవు లేకుండా పని చేసింది. అయితే కొన్ని అత్యవసర పరిస్థితుల్లో ఆమె తోటి సిబ్బంది సాయంతో ఆదివారం సెలవు తీసుకుంటూ వచ్చింది.
ఈ విషయం తెలుసుకుని ఆగ్రహంతో ఊగిపోయిన సదరు మేనేజర్ మేరీని విధుల నుంచి తప్పిస్తూ నిర్ణయం తీసుకున్నారు. దీంతో బాధితురాలు ఈఈఓసీ (సమాన ఉద్యోగ అవకాశ కమిషన్‌)ను ఆశ్రయించింది.
ఈ కేసును విచారించిన ఫ్లోరిడా ఫెడరల్ కోర్టు మేరీ మనోభావాలను దెబ్బతీయడంతో పాటు అదనంగా పనిచేయించినందుకు 21.5 మిలియన్ డాలర్లు(రూ.152.95 కోట్లు) నష్టపరిహారంగా చెల్లించాలని హోటల్ యాజమాన్యాన్ని ఆదేశించింది.
