యావదాస్తిని దానం చేయనున్న ఆపిల్ సీఈవో టిమ్ కుక్!
ప్రపంచ కుబేరులు వారెన్ బఫెట్, బిల్ గేట్స్ సరసన మరో బిలియనీర్ చేరనున్నారు. ఆయనే ఆపిల్ సీఈవో టిమ్ కుక్. పబ్లిసిటీకి దూరంగా ఉండే టిమ్ కుక్, ఫార్చూన్ మేగజైన్ కిచ్చిన ఇంటర్వ్యూలో ఈ విషయం వెల్లడించారు.
ఈయన తన యావదాస్తిని దానం చేయాలని భావిస్తున్నట్టు తాజాగా వెల్లడించారు. తన సోదరుడి కుమారుడి విద్యకయ్యే కొద్ది మొత్తం మినహాయించి, మిగిలినదంతా దాతృత్వ కార్యక్రమాలకు వెచ్చిస్తానని అన్నారు.
ఫార్చూన్ అంచనా ప్రకారం ఆయన ఆస్తి విలువ సుమారు 785 మిలియన్ డాలర్లు. అంటే సుమారు 4,710 కోట్ల రూపాయలు. అలాగే ఆపిల్ సంస్థలో ఆయనకు ఉన్న షేర్ల విలువ 120 మిలియన్ డాలర్లు, కాగా, మరో 665 మిలియన్ డాలర్ల విలువ చేసే షేర్లు ఆయన ఖాతాలో చేరనున్నాయి.
