ఎరుక్కపోయి... ఇరుక్కుపోయిన చిరుత..! బిందెలో తల పెట్టి...
పాపం చిరుత... దాహం వేసింది. గ్రామంలోకి అడుగు పెట్టింది. ఓ ఇంటి పెరట్లో బిందెలో నీళ్లు చూసి దాహం తీర్చుకుందామని ఎరుక్కపోయి ఇరుక్కుపోయింది. ఇక చూస్కో అక్కడ నుంచి చిరుత పులి పిల్లిలా తయారైంది. తన ఎదురుగా ఏముందో కూడా తెలియక ఎక్కడికక్కడ అణుగుతూ ఎటూ వెళ్ళలేక నానా అగచాట్లు పడింది. ఈ సంఘటన రాజస్థాన్‌ జరిగింది. వివరాలిలా ఉన్నాయి.
రాష్ట్రంలోని రాజ్‌సమంద్‌ జిల్లా సర్దుల్‌ ఖేడా గ్రామంలోకి బుధవారం ఉదయం ఓ చిరుతపులి చొరబడింది. అక్కడా ఇక్కడా తిరిగి తిరిగి అలసిపోయి నీళ్ళు తాగుదామని బిందెలో మూతిపెట్టి నీళ్లయితే తాగేసింది. ఇక తల తీద్దామంటే ఇరుక్కుపోయింది. దానిని తీసుకోవడానికి నానా తంటాలు పడింది. అటు పరుగెత్తింది. ఇటు పరిగెత్తింది. వీలు కాలేదు.
చివరకు ఓ మట్టిరోడ్డులో కూర్చుని బిత్తర బిత్తరగా అణిగణిగి ఉండిపోయింది. కళ్ళు కనిపించే అవకాశం లేకపోవడంతో ఎటు వెళ్ళాలో తెలియక అలాగే కూర్చుండిపోయింది. చిరుత ఇబ్బందులు చూసిన గ్రామస్తులు అటవీ అధికారులకు, పోలీసులకు సమాచారం అందించారు. రంగంలోకి దిగిన అటవీశాఖ అధికారులు మత్తుమందు ఇచ్చి ఎట్టకేలకు బిందెను తొలగించారు. పులిని బోనులో బంధించి తీసుకెళ్లి అడవిలో వదిలేశారు. బతుకు జీవుడా అంటూ చిరుత అడవిలోకి తుర్రుమంది.
