ఛత్తీస్‌గఢ్‌లో గిరిజన బాలికపై బ్యాడ్మింటన్ కోచ్ అత్యాచారం.. అరెస్టు
ఛత్తీస్‌గఢ్ రాష్ట్రంలో ఓ గిరిజన బాలికపై బ్యాడ్మింటన్ కోచ్ అత్యాచారానికి పాల్పడ్డాడు. ఈ కేసులో బాధితురాలు ఇచ్చిన ఫిర్యాదు మేరకు.. పోలీసులు అరెస్టు చేశారు. తాజాగా వెలుగులోకి వచ్చిన ఈ వివరాలను పరిశీలిస్తే...
చత్తీస్‌గఢ్‌లోని బిజాపూర్‌లో దన్వైద్ దినకర్ (24) అనే వ్యక్తి బ్యాడ్మింటన్ కోచ్‌గా ఉన్నాడు. బిజాపూర్‌లోని ఓ రెసిడెన్షియల్ స్కూల్ విద్యార్థులు కొందరు బ్యాడ్మింటన్ నేర్చుకోవాలనే ఉద్దేశంతో జనవరి 29న సమీపంలోని దినకర్ నిర్వహించే బ్యాడ్మింటన్ కోర్టుకు వెళ్లారు. సాయంత్రం విద్యార్థులందరూ తిరిగి వచ్చినా ఓ బాలిక మాత్రం తిరిగి స్కూలుకు రాలేదు.
దీనిపై సహచర విద్యార్థినులు పాఠశాల యాజమాన్యం దృష్టికి తీసుకెళ్లారు. ఆ తర్వాత పోలీసులకు సమాచారం చేరవేశారు. దీంతో రంగంలోకి దిగిన పోలీసులు... ఆ బాలిక కోసం గాలించారు. చివరికి ఆమె జగదల్‌పూర్‌లో పోలీసుల కంటపడింది. విచారణ సందర్భంగా ఆమె చెప్పినది విని పోలీసులు ఆశ్చర్యపోయారు. తోటి విద్యార్థులందరూ వెళ్లిపోయిన తర్వాత దినకర్ తనపై అత్యాచారానికి పాల్పడ్డాడని పేర్కొంది. ఆమె ఫిర్యాదుతో కేసు నమోదు చేసిన పోలీసులు ఆదివారం దినకర్‌ను అరెస్ట్ చేశారు.
