ప్రస్తుతం ఆడియెన్స్ టేస్ట్ మారిపోయింది. కంటెంట్ ఉన్న చిత్రాల్నే ఎంకరేజ్ చేస్తున్నారు. కామెన్ మెన్ కథల్నే జనాలు ఎక్కువగా ఇష్టపడుతున్నారు. లక్కీ భాస్కర్, పుష్ప వంటి చిత్రాల్లో కామన్ మెన్ హీరోగా మారుతాడు. అప్పట్లో చిరంజీవి గారు కూడా అదే ఫార్మాట్‌లో చాలా చిత్రాలు చేసి అందరినీ మెప్పించారు అని ప్రియదర్శి అన్నారు.
ప్రియదర్శి హీరోగా శ్రీదేవీ మూవీస్ పతాకంపై శివలెంక కృష్ణ ప్రసాద్ నిర్మాణంలో మోహనకృష్ణ ఇంద్రగంటి తెరకెక్కించిన చిత్రం ‘సారంగపాణి జాతకం’. ఈ సినిమా ఏప్రిల్ 25న రిలీజ్ కానుంది. ఈ సందర్భంగా ప్రియదర్శి మీడియాతో ముచ్చటించారు. ఆయన సినిమా గురించి చెప్పిన సంగతులివే..
ఈ చిత్రం ఎలా ఉండబోతోంది?*
‘సారంగపాణి జాతకం’ కథ లాస్ట్ ఇయర్ విన్నాను. ఈ చిత్రం గత ఏడాది చివర్లో రావాల్సింది. కానీ కాస్త ఆలస్యంగా ఇప్పుడు ఏప్రిల్ 25న వస్తున్నాం. కోర్ట్ లాంటి హిట్ తరువాత మళ్లీ వెంటనే ‘సారంగపాణి జాతకం’ అని వస్తుండటం ఆనందంగా ఉంది. నాకు కాన్ఫిడెన్స్ ఉంది. ఎలాంటి ఒత్తిడి లేదు.
ఈ సినిమాలో మాదిరిగా నిజ జీవితంలో జాతకాలు నమ్ముతారా?
‘సారంగపాణి జాతకం’ చిత్రంలో చూపించినట్టుగా కాదు కానీ.. నేను కొంత నమ్ముతాను. ఇండస్ట్రీలో ఏదీ మన కంట్రోల్‌లో ఉండదు. మంచి సినిమాను చేయాలని ప్రయత్నిస్తాం. ఫలితం మన చేతుల్లో ఉండదు. ఈ మూవీని ఎప్పుడో రిలీజ్ చేద్దామని అనుకున్నాం. కానీ బిజినెస్ పరంగా, థియేటర్ల పరంగా అన్నీ లెక్కేసుకుని ఇప్పుడు ఏప్రిల్ 25న వస్తున్నాం.
ఇండస్ట్రీలోకి రాకముందు మీరు జాతకం చూపించుకున్నారా?
ఇండస్ట్రీలోకి రాకముందు జాతకాలు చూపిస్తే అస్సలు నేను యాక్టర్‌ని అవ్వను అని చెప్పారు. కానీ నేను అవన్నీ పట్టించుకోలేదు. మా అమ్మ తన కొడుకు ఏమైపోతాడో అని అలా జాతకం చూపించారు. కానీ నేను నా మీద నమ్మకంతో వచ్చాను. చేసే పని మీద నేను నమ్మకం పెట్టుకుంటున్నానంతే.
‘సారంగపాణి జాతకం’లో ఏం చెప్పబోతోన్నారు?
జాతకాలు నమ్మాలి అని కానీ నమ్మకూడదు అని కానీ మేం చెప్పం. కానీ ఒకరి నమ్మకాల్ని ఇంకొకరి మీద రుద్దితే ఎలాంటి పరిణామాలు ఎదురవుతాయో చూపిస్తాం. ఏ సైడ్ తీసుకుని మాత్రం కథను చెప్పలేదు.
ఎక్కువగా ఎమోషనల్ స్టోరీలను ఎంచుకుంటున్నారు ?
కామన్ మేన్ పాత్రల్ని పోషిస్తే ఎక్కువ మందికి రీచ్ అవుతుందని నా నమ్మకం. ‘మల్లేశం‘ అయినా, ‘సారంగపాణి‘ అయినా మన చుట్టు పక్కనే చూస్తాం. వారి జర్నీ చాలా పెయిన్ ఫుల్‌గా ఉంటుంది. ‘మల్లేశం, బలగం, కోర్ట్, సారంగపాణి‘ ఇలా అన్నీ కూడా మన చుట్టూనే చూస్తుంటాం. ఇందులో జాతకాల్ని నమ్మే ఓ కుర్రాడి పాత్రను పోషించాను.
ప్రారంభంలో కామెడీ రోల్స్ చేసి ఇప్పుడు ఫుల్ లెంగ్త్ కామెడీ చేయడం ఎలా అపినిస్తుంది?
ప్రస్తుతం నవ్వించడం అనేది చాలా కష్టమైన పని. ఇంద్రగంటి కామెడీ టైమింగ్ చాలా బాగుంటుంది. ఇలాంటి ఓ పాత్రను ఇంత వరకు నేను చేయలేదనిపిస్తోంది. ఇది చాలా కొత్తగా ఉండబోతోంది. ఈ చిత్రం, అందులోని నా పాత్ర అందరికీ నచ్చుతుందని భావిస్తున్నాను.
చిత్రంలో మీ పాత్ర, యాస ఎలా ఉండబోతోంది?
ఇంత వరకు నేను ఎక్కువగా తెలంగాణ మాండలికంలోనే ఎక్కువగా మాట్లాడాను. కానీ ఈ సారి మాత్రం ఆంధ్ర యాసలో మాట్లాడతాను. ఇంద్రగంటి గారి స్టైల్‌లోనే మాట్లాడేందుకు ప్రయత్నించాను. ఆయన నా కోసం ఇందులో సపరేట్ ట్రాక్, టైమింగ్‌ను సెట్ చేశారు. అది అందరికీ నచ్చుతుందని భావిస్తున్నా.
స్టోరీతో ముందుకు వెళ్లే సినిమానా? కారెక్టరైజేషన్‌తో ముందుకు వెళ్లే సినిమానా?
కొన్ని సినిమాలు కారెక్టర్ల మీదే నడుస్తాయి. ‘కోర్ట్‘ చిత్రంలో నాతో పాటు అన్ని కారెక్టర్‌లు హైలెట్ అయ్యాయి. ఫైనల్‌గా సినిమాకు మంచి టాక్ వచ్చింది.. బ్లాక్ బస్టర్ అయింది. నేనున్నాను అని సినిమాకు జనాలు రావడం లేదు. నేను ఓ సినిమాను చేస్తున్నాను అంటే.. అందులో ఏదో ఒక మంచి పాయింట్, కంటెంట్ ఉంటుందని నమ్ముతున్నారు. ప్రస్తుతం ఆడియెన్స్ ఏ సినిమాని చూడాలి? ఏ సినిమాను చూడకూడదు అన్న ఫుల్ క్లారిటీతో ఉన్నారు. సినిమాలో విషయం ఉంటేనే జనాలు చూస్తున్నారు.
ఫ్లాప్స్ వచ్చినప్పుడు స్వీయ విమర్శ చేసుకుంటారా?
సినిమా పోయినప్పుడు కచ్చితంగా నా తప్పుల్ని నేను సరిదిద్దుకుంటాను. ఎక్కడెక్కడ తప్పు చేశాం.. సినిమా ఎందుకు పోయింది.. ఇలా కాకుండా అలా చేసి ఉండాలి.. నెక్ట్స్ టైం జాగ్రత్తగా ఉండాలి అని నాకు నేనుగా విమర్శించుకుంటాను.
నెక్ట్స్ ప్రాజెక్టుల గురించి చెప్పండి?
ఏషియన్ సినిమాస్‌లో ‘ ప్రేమంటే‘ అనే సినిమాను కొత్త దర్శకుడితో చేస్తున్నాను. గీతా ఆర్ట్స్‌లో బన్నీ వాస్ గారి నిర్మాణంలో ‘మిత్రమండలి‘ అనే మరో ప్రాజెక్టుని చేస్తున్నాను. ఇంకా కొన్ని కథలు వింటున్నాను. బలమైన పాత్రలుండే సినిమాల్ని ఎక్కువగా చేయాలని అనుకుంటున్నాను.
