అంబటి రాంబాబుకు పక్కలో బల్లెంగా మారిన అల్లుడు.. ఎలా
వైకాపా నేత, ఏపీ మంత్రి అంబటి రాంబాబుకు ఆయన అల్లుడు కంట్లో నలుసుగా మారాడు. అసలే ఎన్నికల్లో గెలుస్తామో లేదో అన్న భయంతో నిద్రలేని రాత్రులను గడుపుతున్న అంబటి రాంబాబు... ఇపుడు అల్లుడు డాక్టర్ గౌతమ్ విడుదల చేస్తున్న రోజుకో వీడియో మంత్రి అంబటికి కంటిమీద కునుకు లేకుండా చేస్తుంది. తాజాగా మరో వీడియోను డాక్టర్ గౌతమ్ రిలీజ్ చేశారు.
'నా బిడ్డల్ని నాలుగేళ్లుగా నాకు దూరం చేసి, నా ప్రాణాన్ని తీసేసినంత పనిచేసి.. ఎలాంటి తప్పూ చేయలేదని బుకాయిస్తున్నారా? ఇదేనా న్యాయం' అంటూ మంత్రి అంబటి రాంబాబును ఆయన రెండో అల్లుడు డాక్టర్ గౌతమ్ సూటిగా ప్రశ్నించారు. ఇటీవల అంబటి రాంబాబును విమర్శిస్తూ గౌతమ్ వీడియో చేయగా అది సామాజిక మాధ్యమాల్లో వైరల్‌ అయిన విషయం తెల్సిందే. దానిపై అంబటి విలేకర్ల సమావేశం పెట్టి పలు ఆరోపణలు చేశారు.
ఈ నేపథ్యంలో గౌతమ్ మంగళవారం మరో సెల్ఫీ వీడియో విడుదల చేశారు. అందులో మాట్లాడుతూ.. 'నా వీడియోపై అంబటి రాంబాబు స్పందిస్తూ నాలుగేళ్లుగా తన మనవడు, మనవరాలిని చాలా జాగ్రత్తగా చూసుకుంటున్నానని, అల్లుడైన నేను ఆర్థిక సాయం చేయట్లేదని అన్నారు. నా కుమారుడు, కుమార్తెను మీరు పోషించక్కర్లేదు. రేపు మీడియా సాక్షిగా వారిద్దర్నీ మీ ఇంటికి వచ్చి తీసుకెళ్తా లేదా నా ఇంటి వద్ద దించి వెళ్లండి. మీరు వారి కోసం ఒక్క రూపాయీ పెట్టక్కర్లేదు' అని పేర్కొన్నారు.
'2023 మార్చి 3న నా తండ్రి ఐసీయూలో బెడ్‌పై ఉండి తన మనవడు, మనవరాలిని చూడాలని ఉందని అంబటి రాంబాబును కోరారు. మాట్లాడలేని స్థితిలో ఉండి చివరి కోరికగా పిల్లల్ని చూడాలని ఉందని ఎంతగానో ప్రాధేయపడ్డారు. దీనిపై ఎన్ని సందేశాల్ని పంపినా రాంబాబు స్పందించలేదు. నా తండ్రి అదే నెల 22న చనిపోతే కనీసం చివరిసారి చూడటానికైనా పిల్లల్ని పంపించ లేదు. ఇదేనా మీ మంచితనం. మీ కుటుంబాన్ని ప్రశ్నిస్తే ఎంత దుర్మార్గమైనా చేసేస్తారా? ఒక తండ్రి ఆఖరి కోరిక తీర్చలేని కుమారుడిగా నన్ను చేస్తారా? అసలు మీరు మనిషేనా. మీతో విసుగెత్తి చివరికి కోర్టుకు వెళ్తే దానికీ వేరే అర్థాలు చెబుతారా?' అని గౌతమ్ ఆవేదన చెందారు.
