మెగా హీరోతో భాగమతి డైరెక్ట‌ర్ మూవీ..?
ఆకాశ రామ‌న్న సినిమాతో దర్శకుడిగా మారి... పిల్ల జమీందార్ సినిమాతో తొలి విజయం అందుకున్న యువ ద‌ర్శ‌కుడు జి.అశోక్. ఆ తర్వాత సుకుమారుడు, చిత్రాంగద చిత్రాలు తెర‌కెక్కించినా అవి నిరాశ పరిచాయి. అనుష్క ప్రధాన పాత్రగా అశోక్ తెర‌కెక్కించిన భాగమతి చిత్రం ఘ‌న విజయం సాధించింది. 2018లో టాలీవుడ్ విజయాలకు నాంది పలికింది ఈ సినిమామే అయినప్పటికీ అశోక్‌కు మాత్రం అవకాశాలు తెచ్చిపెట్టలేదు.
ఇక అస‌లు విష‌యానికి వ‌స్తే...ఎట్టకేలకు ఆయనకు ఇప్పుడో అవకాశం వచ్చింది. మెగాస్టార్ మేనల్లుడు సాయిధరమ్‌తేజ్‌తో ఆయన కలిసి పనిచేయనున్నారు. భాగమతి సినిమా వ‌లే ఈ సినిమా కూడా ఫాంటసీ డ్రామా నేపథ్యంలోనే తెరకెక్కనుందని తెలిసింది.
సాయిధరమ్ తేజ్ ప్రస్తుతం చిత్రలహరి సినిమాతో బిజీగా ఉన్నారు. కిషోర్ తిరుమల దర్శకత్వం వహిస్తున్న ఈ సినిమాలో నివేదా థామస్, కళ్యాణి ప్రియదర్శిని హీరోయిన్లుగా నటిస్తున్నారు. ఈ సినిమా పూర్తి కాగానే అశోక్ తో మూవీ సెట్స్ పైకి వెళుతుంద‌ని స‌మాచారం.
