సినిమా నటులపై ట్రోల్స్... డీజీపీ ఫిర్యాదు చేసిన 'మా'
సోషల్ మీడియా వేదికగా సినీ నటులను లక్ష్యంగా ట్రోల్స్, అసభ్య, అసత్య ప్రచారం చేస్తున్న వారిపై కఠిన చర్యలు తీసుకోవాలని తెలంగాణ రాష్ట్ర డీజీపీ జితేందర్‌కు మూవీ ఆర్టిస్ట్ అసోసియేషన్ (మా) సభ్యులు ఫిర్యాదు చేశారు. ఈ మేరకు గురువారం డీజీపీని కలిసి ఓ వినతి పత్రం సమర్పించారు. సినీ నటులపై ట్రోల్స్ చేస్తున్నందుకుగాను, ఇప్పటికే ఐదు యూట్యూబ్‌ ఛానళ్లను రద్దు చేయగా, మరో 250 యూట్యూబ్‌ ఛానళ్ల జాబితాను డీజీపీకి సమర్పించి, వారిపై కఠిన చర్యలు తీసుకోవాలని మా సభ్యులు కోరారు.
ఈ ఫిర్యాదుపై సానుకూలంగా స్పందించిన డీజీపీ.. సైబర్‌ సెక్యూరిటీ విభాగం సహకారంతో ప్రత్యేక సెల్‌ను ఏర్పాటు చేసి, ట్రోలర్స్‌పై దృష్టి సారిస్తామని హామీ ఇచ్చారు. అనంతరం నటుడు రాజీవ్‌ కనకాల మాట్లాడుతూ.. విమర్శలు, ట్రోల్స్ సరదాగా నవ్వుకునేలా ఉంటే బాగుంటుంది కానీ, వ్యక్తిగత విమర్శలు చేసి, కుటుంబ సభ్యులను కూడా ఏడిపించేలా ఉండరాదన్నారు. డబ్బు కోసం కొన్ని యూట్యూబ్‌ ఛానళ్లు అనుసరిస్తున్న విధానాలు దారుణంగా ఉన్నాయని, ఇలాంటి వాటిని అస్సలు ఉపేక్షించేది లేదని ఆయన తెలిపారు.
