హీరోయన్లు కాదు... సన్నివేశాలు అసభ్యకరంగా ఉన్నాయ్ : నటి జమున

వెండితెరపై అందాలు ఆరబోయడానికి పోటీపడుతున్న నేటితరం హీరోయినలపై సీనియర్ నటి జమున విమర్శలు గుప్పించారు. ఇప్పటి నటీమణులు హీరోయిన్లు కాదంటూ ఘాటుగా వ్యాఖ్యానించింది. పైగా, ఇప్పటితరం హీరోయిన్ల వైఖరిపై ఆమె తీవ్ర ఆవేదన వ్యక్తంచేసింది. 

ఇదే అంశంపై ఆమె మాట్లాడుతూ, తమ కాలంలో రొమాంటిక్ సీన్స్ తీయాలంటే అందుకు పరిమితి అంటూ ఒకటి ఉండేదన్నారు. తమ హయాంలో సెన్సార్ బోర్డు కూడా చాలా కఠినంగా ఉండేదని చెప్పారు. ఇప్పటి సినిమాల్లో కొన్ని సన్నివేశాలు చాలా అసభ్యకరంగా ఉంటున్నాయని జమున ఆవేదన వ్యక్తం చేశారు. 

ఇపుడు బాలీవుడ్ చిత్రాల నుంచి ఎదురయ్యే పోటీని తట్టుకుని నిలబడేందుకు వీలుగా రొమాంటిక్ సన్నివేశాలు సినిమాలో పెడుతున్నారని ఆమె ఆరోపించారు. అందుకే ఇప్పటితరం చిత్రాలను తాను చూడటం మానేశానని గుర్తుచేశారు.

ఇప్పుడు వస్తున్న హీరోయిన్లు కూడా కేవలం డబ్బుకే ప్రాధాన్యత ఇస్తున్నారని, మంచి వేషాలపై వారు దృష్టి పెట్టడం లేదని ఆవేదన వ్యక్తం చేశారు. నేటి తెలుగు సినిమాల్లో తెలుగు హీరోయిన్లే కనిపించడం లేదని, ఇతర భాషల నుంచి హీరోయిన్లను తీసుకొస్తున్నారని, వారు వచ్చిరాని తెలుగులో మాట్లాడుతున్నారన్నారు. నిర్మాతలు, దర్శకులు వెతికితే తెలుగులో ఎంతో మంది మంచి నటీమణులు దొరుకుతారని ఆమె అభిప్రాయపడ్డారు.