గురువారం, 28 మార్చి 2024
  1. వార్తలు
  2. బిజినెస్
  3. వార్తలు
Written By
Last Updated : సోమవారం, 12 ఆగస్టు 2019 (14:50 IST)

జొమాటోపై డెలివరీ బాయ్స్ ఫైర్-మా చేత గొడ్డు మాంసం, వారిచేత పోర్క్‌ ఏంటిది?

ఆన్‌లైన్ ఫుడ్ డెలివరీ సంస్థ జొమాటోకు వివాదాలు తప్పట్లేదు. ముస్లిం వ్యక్తి చేత ఫుడ్ డెలివరీ చేయిస్తున్నారని ఓ హిందూ వ్యక్తి ఆర్డర్ క్యాన్సిల్ చేయడంతో గతంలో జొమాటో మతం రంగు అంటింది. కానీ జొమాటోకు మతం రంగు పులమొద్దంటూ ఆ సంస్థ తేల్చేసింది. ఈ నేపథ్యంలో తాజాగా మరోసారి జొమాటో సంస్థ వార్తల్లో నిలిచింది. 
 
జొమాటోపై పలు ఆరోపణలు చేస్తూ కొంతమంది ఫుడ్ డెలివరీ బాయ్స్ రోడ్డెక్కారు. తమ మనోభావాలకు వ్యతిరేకంగా బీఫ్, పోర్క్ వంటి వంటకాలను సప్లై చేయిస్తున్నారని నిరసనకు దిగారు. జొమాటో మా మనోభావాలకు ఏమాత్రం విలువ ఇవ్వడం లేదని డెలివరీ బాయ్స్ మండిపడుతున్నారు. ఇకనైనా బీఫ్, పోర్క్ డెలివరీ సర్వీస్‌ను రద్దు చేయాలని డిమాండ్ చేశారు.
 
జొమాటో మా సెంటిమెంట్స్‌తో ఆడుకుంటోంది. మా చేత అన్నిరకాల ఫుడ్స్ డెలివరీ చేయిస్తోంది. హిందువులమైన మా చేత బీఫ్ డెలివరీ చేయిస్తున్న జొమాటో.. భవిష్యత్‌లో ముస్లిం సోదరుల చేత పోర్క్‌ను కూడా డెలివరీ చేయిస్తుంది. కాబట్టి మతపరమైన విశ్వాసాలతో జొమాటో ఆటలాడవద్దు. అలాగే డెలివరీ బాయ్స్ వేతనాలు కూడా పెంచాలని డిమాండ్ చేస్తున్నామని కోల్‌కతా డెలివరీ బాయ్స్ నిరసనకు దిగారు. 
 
మతపరమైన విశ్వాసాలకు వ్యతిరేకంగా జొమాటో డెలివరీ బాయ్స్‌పై బలవంతంగా ఏదీ రుద్దవద్దని బెంగాల్ ఇరిగేషన్ మంత్రి రాజీవ్ బెనర్జీ చెప్పారు. దీనిపై తగిన చర్యలు తీసుకుంటామన్నారు.