గగనంలో గాలిపటాల సమరం
|
ఇక పండుగ సమీపిస్తుందనగా రంగురంగుల గాలిపటాలతో ఆకాశంలో ఇంద్రచాపం తొంగిచూసిన భావనకు చూపరులు లోనవుతారు. అంతేనా... అంబరంలో సంబరం చేసుకుంటామంటూ పతంగులు పెద్ద సంఖ్యలో తమ విహారాన్ని కొనసాగిస్తుండటంతో పక్షులు పత్తా లేకుండా పోతాయి. ఇక ఇక్కడే అసలు కథ మొదలవుతుంది. అప్పటిదాకా శాంతి కపోతంలా విహరించిన గాలిపటం కాస్త క్షిపణిలా మారుతుంది. పతంగును పైకి చేర్చే దారానికి గాజు పొడిని అద్ది పదును తేలుస్తాడు దారం చివర్న ఉన్న యజమాని.
ఇంకేముంది శంఖారావం లేకుండానే ఆకాశంలో పతంగుల రణరంగం ప్రారంభమవుతుంది. యుద్ధ వాతావరణం నెలకొనేసరికి పిల్లలతో పాటుగా పెద్దలు కూడా పతంగుల పోరాటంలో పాలు పంచుకోవడం మొదలుపెడతారు. యుద్ధరంగంలోని పతంగులు సైనికుడు, దళపతి, మంత్రి, రాజు తదితర రూపాలతో గాలివాటుగా బయలుదేరుతాయి. అరుపులు, కేకలతో గాలిపటాలకు వీర గంధం దిద్ది వినీలకాశంలోకి పంపుతారు పతంగుల యజమానులు.
వీధిలోని మూడవ మేడ మీద నుంచి బయలుదేరిన గాలిపటం క్రూరంగా చూస్తూ ఒకటవ మేడ మీద నుంచి ఆకాశంలో స్వేచ్ఛగా విహరిస్తున్న గాలిపటంను సమీపించేసరికి ఒకటి, మూడు మేడల నుంచి గాలిపటాలను నడుపుతున్న వారిలో మొదట ఉత్కంఠ, తర్వాత ఉత్సాహం, అటుపిమ్మట సవాళ్లు చేసుకునే స్థాయికి ఆవేశం చేరుకుంటుంది. మధ్యమధ్యలో ఇంట్లో నుంచి పైకి వచ్చే పిండివంటకాలపై తమ ప్రతాపాన్ని చూపిస్తూ పతంగులను రెచ్చగొడుతుంటారు.
|
ఇరు వర్గాలు ఆశ్చర్యం నుంచి తేరుకునేలోగా అప్పటిదాకా విజయాన్ని తలకెక్కించుకున్న మూడవ మేడ గాలిపటాన్ని మరో గాలిపటం వచ్చి పుటుక్కున తెంపేసింది. మూడవ వాడికి కాకుండా తామిరువురులో ఒకరికే దక్కాలనే సరికొత్త సంఘీభావంతో రెండు మేడలకు చెందిన పిల్లలు పరుగులు తీస్తున్నారు... గాలిపటం దిశకు అనుగుణంగా... ఈ సారి ఎవరికి దక్కుతుంది? మరో గడుగ్గాయి రాకపోవచ్చునని ఎలా చెప్పగలం...
