ఆరేళ్ల పిల్లాడిని బెల్టుతో కొట్టాడు.. మంచంపైకి విసిరేశాడు.. కర్కశుడైన కన్నతండ్రి
చిన్నారి పట్ల కర్కశంగా వ్యవహరించిన తండ్రిని పోలీసులు అరెస్ట్ చేశారు. ట్యూషన్‌కు వెళ్లకుండా హోమ్ వర్క్ విషయంలో అబద్ధం చెప్పాడని.. కన్న కుమారుడినే కనికరం లేకుండా ఓ తండ్రి అత్యంత కర్కశంగా ప్రవర్తించాడు.
చిన్నారి పట్ల కర్కశంగా వ్యవహరించిన తండ్రిని పోలీసులు అరెస్ట్ చేశారు. ట్యూషన్‌కు వెళ్లకుండా హోమ్ వర్క్ విషయంలో అబద్ధం చెప్పాడని.. కన్న కుమారుడినే కనికరం లేకుండా ఓ తండ్రి అత్యంత కర్కశంగా ప్రవర్తించాడు. ఆరేళ్ల పిల్లాడిని బెల్టుతో కొట్టడంతో పాటు.. పిల్లాడు ఏడుస్తున్నా పట్టించుకోకుండా.. ఎత్తు నుంచి మంచంపై విసిరాడు.
మంచంపై నుంచి కిందకేసి కాళ్లతో తొక్కుతూ పైశాచికంగా ప్రవర్తించాడు. ఈ ఘటన బెంగళూరులోని కెంగెరిలో చోటుచేసుకుంది. ఇంత జరుగుతున్నా కన్నబిడ్డను తండ్రి చావబాదుతున్నా.. తల్లి మాత్రం వీడియో తీసింది. వివరాల్లోకి వెళితే.. పిల్లాడి తండ్రి ఐటీ కన్సల్టెన్సీలో ఉద్యోగి అని తెలిసింది. నవంబర్ 17, 2017న ఈ ఘటన జరిగింది. అయితే ఈ వీడియో ఇప్పుడు వైరల్ అయింది.
ఈ వీడియోలో ఎలా వెలుగులోకి వచ్చిందంటే.. బాలుడి తండ్రి అతని ఫోన్ పాడవడంతో కొద్దిరోజుల క్రితం రిపేర్‌కు ఇచ్చాడు. రిపేర్‌కిచ్చే సమయంలో ఆ వీడియో మొబైల్‌లోనే సేవ్ అయి ఉంది. డిలీట్ చేయలేదు. ఆ ఫోన్‌ను రిపేర్ చేసిన టెక్నీషియన్ అందులో ఉన్న వీడియో చూసి షాకయ్యాడు. ఆ వీడియోను బయటపెట్టడంతో అసలు విషయం వెలుగులోకొచ్చింది.
నిందితుడి పేరు మహేంద్ర, పిల్లాడి తల్లి పేరు శిల్పగా పోలీసులు గుర్తించారు. ఇలా కన్నబిడ్డను కొట్టడమే కాకుండా వీడియో ఎందుకు తీశారని అడిగితే.. పిల్లాడు మళ్లీ హోమ్ వర్క్ విషయంలో అబద్ధం చెప్తే ఈ వీడియోను చూపెట్టేందుకు సేవ్ చేసి వుంచామని తల్లిదండ్రులు చెప్పడంతో పోలీసులు షాక్ అయ్యారు. పోలీసులు కేసును సుమోటోగా నమోదు చేసి.. పిల్లాడి తండ్రిని అరెస్ట్ చేశారు.
