చదివింది బీఎస్సీ.. యూట్యూబ్ చూస్తూ అబార్షన్లు.. ఎలా పట్టుకున్నారంటే..?
బీఎస్సీ చదవిన ఓ మెడికల్ రిప్రజెంటేటివ్‌ డాక్టర్‌గా అవతారం ఎత్తాడు. అంతటితో ఆగకుండా వరంగల్‌ నగరం నడిబొడ్డున ఆసుపత్రి నిర్వహిస్తున్నాడు. అంతేకాకుండా అబార్షన్లలో దిట్టగా మారాడు. యూట్యూబ్ చూస్తూ అబార్షన్లు చేస్తూ మహిళల ప్రాణాలతో చెలగాటమాడాడు. ఈ విషయం వెలుగులోకి రావడంతో బుధవారం అర్ధరాత్రి వైద్య ఆరోగ్యశాఖ అధికారులు దాడిచేసి పోలీసులకు అప్పగించారు.
వివరాల్లోకి వెళితే.. వరంగల్‌ రూరల్‌ జిల్లా చెన్నారావుపేటకు చెందిన అండ్రు ఇంద్రారెడ్డి(38) నెల రోజుల క్రితం హన్మకొండలోని ఏకశిలా పార్కు ఎదురుగా సిటీ హాస్పిటల్‌ పేరిట ఆసుపత్రి ప్రారంభించాడు. రెండోసారి ఆడపిల్లలు వద్దనుకునే మహిళలను ఆర్‌ఎంపీలు, పీఎంపీల ద్వారా గుర్తిస్తున్నాడు. నర్సింగ్‌లో శిక్షణ పొందినవారి సాయంతో.. యూట్యూబ్ చూస్తూ అబార్షన్లు చేస్తున్నాడు. దీనిపై సమాచారం అందడంతో బుధవారం అర్ధరాత్రి రెవెన్యూ అధికారులు, జిల్లా వైద్య ఆరోగ్యశాఖ అధికారులు ఆసుపత్రిపై దాడిచేశారు.
ఆ సమయంలో మహారాష్ట్ర నుంచి వచ్చిన మహిళలకు చికిత్స చేస్తున్నారు. అధికారులను చూసి వైద్య సిబ్బంది గోడదూకి పారిపోయారు. థియేటర్లో ఉన్న మహిళను బాత్రూంలో దాచారు. ఆమెకు తీవ్ర రక్తస్రావం అవుతుండటంతో హన్మకొండ జీఎంహెచ్‌కు తరలించారు. డీఎంహెచ్‌వో ఫిర్యాదు మేరకు నకిలీ వైద్యుడిపై పోలీసులు క్రిమినల్‌ కేసు నమోదు చేశారు. ఇంకా నిందితుడిని పోలీసులు అరెస్ట్ చేసారు.
