'ఆర్ఆర్ఆర్' కోసం డబ్బింగ్ పూర్తి చేసిన ఎన్టీఆర్ - చెర్రీ
దర్శక ధీరుడు ఎస్ఎస్ రాజమౌళి తెరకెక్కిస్తున్న చిత్రం ఆర్ఆర్ఆర్. జూనియర్ ఎన్టీఆర్, రామ్ చరణ్‌లు హీరోలుగా నటిస్తున్నారు. ఈ చిత్రం జనవరి ఏడో తేదీన విడుదలకానుంది. ఇప్పటికే షూటింగ్ పూర్తి చేసుకున్న ఈ చిత్రం ప్రస్తుతం పోస్ట్ ప్రొడక్షన్ కార్యక్రమాలను జరుపుకుంటుంది. ఇందులోభాగంగా, డబ్బింగ్ పనులు సాగుతున్నాయి.
ఈ క్రమంలో జూనియర్ ఎన్టీఆర్, రామ్ చరణ్ డబ్బింగ్‌ను పూర్తి చేశారు. మలయాళం వెర్షన్ కోసం కొన్ని చిన్న రీ-రికార్డింగ్, డబ్బింగ్ పనులు మినహా, మొత్తం పోస్ట్ ప్రొడక్షన్ పూర్తయ్యే దశలో ఉంది.
డివివి దానయ్య నిర్మిస్తున్న ఈ మూవీ రైట్స్‌ను నెట్‌ఫ్లిక్స్, జీ5 సొంతం చేసుకున్నాయి. థియేట్రికల్ విడుదల తర్వాత సినిమా తమిళం, తెలుగు, మలయాళం, కన్నడ వెర్షన్‌లు జీ5లో అందుబాటులో ఉంటాయి. హిందీ, కొరియన్, పోర్చుగీస్, టర్కిష్, స్పానిష్ వెర్షన్‌లు నెట్‌ఫ్లిక్స్‌లో ప్రసారం అవుతాయి.
కాగా, స్వాతంత్ర్యానికి ముందు జరిగే ఈ పీరియాడికల్ యాక్షన్ ఎంటర్‌టైనర్‌లో ఎన్టీఆర్, రామ్ చరణ్, అలియా భట్, ఒలివియా మోరిస్ ప్రధాన పాత్రలు పోషిస్తున్నారు. అజయ్ దేవగన్, శ్రియ వంటి స్టార్స్ సైతం ఇందులో భాగం అయ్యారు.
గత కొన్నాళ్లుగా నెలకొన్న సస్పెన్స్‌‍కు తెర దించుతూ ఇటీవలే ఈ సినిమా విడుదల తేదీని రివీల్ చేశారు మేకర్స్. ఈ మూవీ 7 జనవరి 2022 న థియేటర్‌లలోకి వస్తుందని రాజమౌళి ప్రకటించాడు. అయితే తాజాగా సినిమాకు సంబంధించిన డబ్బింగ్ పనులు జోరుగా సాగుతున్నట్టు తాజాగా ప్రకటించారు.
