శ్రీముఖికి రోజుకి రూ. 3 లక్షలా.... ఏంటి అంత క్రేజ్...? మాట్లాడతావా బిగ్ బాస్?
బిగ్ బాస్ హౌసులో శ్రీముఖి చాలా ఎక్కువగా నటిస్తుందని ఎలిమినేట్ అయిన హేమ చెప్పిన సంగతి తెలిసిందే. ఐతే బిగ్ బాస్ ఇంటిలో ఇలాంటి నటనలు, వయ్యారాలు ఇంకా తదితర వేషాలు వెయ్యకపోతే నిలబడటం కష్టం మరి.
హేమక్క అలా అనుకుంది కానీ మన్ను తిన్న పాములా కదలకుండా కూర్చున్నా లేదంటే మరీ ఎక్కువ చేసినా బిగ్ బాస్ ఇంటి నుంచి గెంటేస్తారు. కాబట్టి షోలో అరటి పండు కాకుండా వుండాలంటే గేమ్‌లో సెంటర్ ఫర్ అట్రాక్షన్‌గా నిలబడాలి.
ఈ షోలో శ్రీముఖి అలాగే చేయాల్సినవన్నీ చేస్తూ లాగించేస్తుంది. పైగా తను బిగ్ బాస్ ఇంట్లో వున్నప్పటికీ బయట తనకోసం ఓ శ్రీముఖి ఆర్మీ పనిచేస్తోంది. గతంలో కౌశల్ ఆర్మీలా. ఐతే ఈ ఆర్మీలు ఈసారి బాగా ఎక్కువయ్యాయనుకోండి. ఏదేమైనప్పటికీ బిగ్ బాస్ ఇంట్లో ఎవరూ అందరికంటే ఆట బాగా ఆడుతారో వారిదే పైచేయి... వారే విజేతగా నిలుస్తారు.
ఇదిలావుంటే అసలు బిగ్ బాస్ ఇంట్లోకి అడుగుపెట్టేందుకే శ్రీముఖికి బాగా ముట్టిందనే ప్రచారం ఓ లెవల్లో జరుగుతోంది. హౌసులో కేవలం మాట్లాడటం మాత్రమే చేసే బిగ్ బాస్ శ్రీముఖికి రోజుకి రూ. 3 లక్షల పారితోషికాన్ని సమర్పించుకున్నట్లు ఓ వార్త అటు నెట్ ప్రపంచంలో ఇటు టీవీ ప్రపంచంలో ఊదరగొడుతోంది.
అంటే 100 రోజులకి( హౌసులో వున్నా ఎలిమినేట్ అయినా) రూ. 3 కోట్లు అని చెప్పుకుంటున్నారు. మరి ఇందులో ఎంత నిజం వుందో బిగ్ బాసే చెప్పాలి. హోస్టు నాగార్జున అడిగితేనే బిగ్ బాస్ తిరిగి సమాధానం చెప్పడు. మరి మనం అడిగితే ఇంకేం చెపుతాడు?
