వాలంటీర్ వక్రబుద్ధి.. బాలింతపై లైంగిక వేధింపులు..
వయోబేధం లేకుండా మహిళలపై అకృత్యాలు జరుగుతూనే వున్నాయి. గర్భవతి అయినా బాలింతలైనా కామాంధుల దుశ్చర్యలకు హద్దుల్లేకుండా పోతున్నాయి. తాజాగా ప్రజాసేవకు పాటు పడాల్సిన ఓ వాలంటీర్ వక్రబుద్ది చూపించాడు. బాలింతపై లైంగిక వేధింపులకు పాల్పడ్డాడు. ఈ ఘటన గుంటూరు జిల్లాలో ఆలస్యంగా వెలుగుచూసింది.
మాచవరం మండలం పిల్లుట్ల గ్రామంలో వాలంటీర్‌గా పనిచేసే గోపీ.. ఓ బాలింతను కామవాంఛ తీర్చాలంటూ వేధించాడు. అంతటితో ఆగకుండా ఇంట్లోకి వచ్చి బలవంతం చేయబోయాడు. దీంతో బాధితురాలు పాలు తాగుతున్న బిడ్డను వదిలి బయటకు పరుగులు తీసింది.
ఈ విషయం ఊర్లో వారికి చెబితే ఊరుకునేది లేదంటూ బెదిరింపులకు తెగబడ్డాడు. వేధింపులు తాళలేక బాధితురాలు పోలీసులను ఆశ్రయించించింది. వాలంటీర్‌పై కఠిన చర్యలు తీసుకుంటామని మాచవరం ఎస్‌ఐ కోటయ్య తెలిపారు.
