ఐఐటీ ఖరగ్పూర్ విద్యార్థికి రూ.1.5 కోట్ల వార్షిక వేతనం ఆఫర్!
ఐఐటీ ఖరగ్పూర్ విద్యార్థికి ఓ బంపర్ ఆఫర్ వచ్చింది. ఈ ఐఐటీ క్యాంపస్లో నిర్వహించిన క్యాంపస్ ఇంటర్వ్యూలలో అతనికి 1.5 కోట్ల వార్షిక వేతనంతో కూడిన జాబ్ ఆఫర్ వచ్చింది. ఈ క్యాంపస్ ఇంటర్వ్యూలో మొత్తం 27 కంపెనీలు క్యాంపస్ ఇంటర్వ్యూలు నిర్వహించగా 163 మందికి అవకాశాలు లభించాయని కెరీర్ డెవలప్మెంట్ సెంటర్, ఐఐటీ-ఖరగ్పూర్ ఛైర్మన్ ప్రొఫెసర్ సుధీర్ కుమార్ బరారీ తెలిపారు.
ఈ యేడాది ఓ భారత ఐఐటీ విద్యార్థికి లభించిన అత్యధిక వేతన ఆఫర్ ఇదే కావడం గమనార్హం. ఈ ఆఫర్ విదేశాలకు వెళ్లి పని చేసే ఒప్పందంపై ఆ విద్యార్థికి లభించిందని, ఇక మన దేశంలో పనిచేసే విషయానికి వస్తే ఓ విద్యార్థి రూ.42 లక్షల ప్యాకేజి అందుకున్నాడని తెలిపారు. విద్యార్థి వివరాలు వెల్లడించేందుకు అధికారులు నిరాకరించారు. మొత్తం క్యాంపస్ ఇంటర్యూల్లో ఇప్పటి వరకు 251 మందికి జాబ్ ఆఫర్లను లభించినట్టు చెప్పారు. ఇందులో 88 మందికి ముందుగా ఆఫర్లు వచ్చాయన్నారు.
