ఈసీజీ తీయాలని వివస్త్రను చేసి అసభ్యంగా ప్రవర్తించిన టెక్నీషియన్!
అనారోగ్యంతో ఆస్పత్రికి వెళ్లిన ఓ యువతికి చేదు ఘటన ఎదురైంది. ఈసీజీ తీసేందుకు ఆ యువతితో దుస్తులన్నీ విప్పించి... ఆ తర్వాత టెక్నీషియన్ అసభ్యంగా ప్రవర్తించాడు. ఈ దారుణం గుంటూరు జిల్లా కేంద్రంలోని జనరల్ ఆస్పత్రిలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, పాత గుంటూరుకు చెందిన 19 ఏళ్ల యువతికి కొద్దిరోజులుగా ఛాతితో బాధపడుతూ వస్తుంది. దీంతో ఆమె తన తల్లిదండ్రులతో కలిసి ఆసుపత్రికి వచ్చింది. పరీక్షించిన వైద్యులు ఈసీజీ పరీక్షలు చేయించుకు రావాలని చీటీ రాసి ఇచ్చారు.
యువతి ఈసీజీ తీయించుకోవడానికి వెళ్లింది. ఆ విభాగంలో ఉన్న హరీష్ ఆమెతోపాటు వచ్చిన తల్లిదండ్రులను గది బయటకు పంపించాడు. యువతికి ఈసీజీ తీస్తానంటూ వస్త్రాలను తొలగించాలన్నాడు. అందుకు ఆమె అడ్డు చెప్పడంతో అలాగైతే ఈసీజీ సరిగా తీయలేం... ఛాతి లోపల సమస్య ఏమిటో రిపోర్టులో స్పష్టంగా రావాలంటే తప్పనిసరిగా వస్త్రాలు తీయాలంటూ ఒత్తిడి చేశాడు.
ఇంకా చాలా మంది వేచి ఉన్నారు.. త్వరగా తీయించుకుంటావా లేదా అంటూ హడావిడి చేసి ఆమె చేత బలవంతంగా వస్త్రాలన్నింటినీ తొలగించి వేయించాడు. కళ్లు మూసుకొని అక్కడ ఉన్న బల్లపై పడుకోవాలని చెప్పి ఆమె పట్ల అసభ్యంగా ప్రవర్తించడంతో పాటు వాటిని తన చరవాణిలో చిత్రీకరిస్తుండగా ఖంగుతిన్న ఆమె అతన్ని ప్రతిఘటిస్తూ బల్లపై నుంచి పైకి లేచింది.
లోపలకు వెళ్లిన తన కుమార్తె ఎంతసేపైనా ఇంకా బయటకు రాకపోవడంతో తల్లిదండ్రులు హైరానా పడుతున్నారు. ఇంతలో లోపల నుంచి ఆ యువతి ఏడ్చుకుంటూ బయటకు వచ్చి జరిగిన విషయాన్ని తన తండ్రికి తెలిపింది. కోపోద్రిక్తుడైన తండ్రి అతన్ని నిలదీయగా తాను అలా ప్రవర్తించలేదంటూ బుకాయించే ప్రయత్నం చేశాడు. ఆ తర్వాత జీజీ హెచ్‌లోని అవుట్ పోస్టు పోలీసులకు ఫిర్యాదు చేయడంతో కేసు నమోదు చేసి విచారణ జరుపుతున్నారు.
