హెచ్-1బీ వీసాదారులకు ఊరట.. ఊపిరిపీల్చుకున్న భారతీయులు
ప్రవాస భారతీయులుకు అమెరికా ఓ శుభవార్త చెప్పింది. హెచ్-1బీ వీసా గడువు ముగిసిపోయిన వారంతా తెగ హైరానా పడుతూ వచ్చారు. ఇలాంటి వారికి కరోనా కష్టాల్లో ఊరటనిచ్చే వార్తను అమెరికా అధ్యక్షుడు డోనాల్డ్ ట్రంప్ వెల్లడించారు.
ఇదే అంశంపై యూఎస్ డిపార్ట్‌మెంట్ ఆఫ్ హోమ్ ల్యాండ్ సెక్యూరిటీ (డీహెచ్ఎస్) ఓ ప్రకటన చేసింది. వీరి వీసా గడువు పొడిగించేందుకు త్వరలోనే దరఖాస్తులు స్వీకరిస్తామని వెల్లడించింది. హెచ్-1 బీ వీసా గడువు ముగిసినా కరోనా మహమ్మారి కారణంగా ఎక్కడికీ వెళ్లలేక ఇక్కడే ఉండిపోయిన పరిస్థితిని తాము గుర్తించామని చెప్పింది.
ఈ వీసాపై ఉన్న వారు గడువు పొడిగించాలని కోరుతూ సరైన సమయంలో దరఖాస్తు చేసుకోవాలని సూచించింది. ప్రస్తుత నిబంధనల ప్రకారం హెచ్-1బీ వీసాపై 240 రోజుల గడువుదానంతట అదే లభిస్తుందని తెలిపింది. అమెరికా ప్రభుత్వం తీసుకున్న ఈ నిర్ణయంతో హెచ్-1బీ వీసాపై అక్కడికి వెళ్లి చిక్కుకుపోయిన భారతీయులకు ఊరట లభించినుంది.
కాగా, వీసా గడువు ముగిసినప్పటికీ.. కరోనా మహమ్మారి కారణంగా అనేకమంది భారతీయులు విదేశాల్లోనే ఉండాల్సిన పరిస్థితి ఏర్పడింది. హెచ్-1బీ వీసాపై అమెరికా వెళ్లిన భారతీయుల పరిస్థితి కూడా అలాగే ఉంది. ఇలాంటి తరుణంలో వారికి ఊరట ఇచ్చే మాటను యూఎస్ ప్రభుత్వం చెప్పింది.
కరోనా కారణంగా అంతర్జాతీయ విమాన సర్వీసులు రద్దు కావడంతో చాలా మంది హెచ్- 1బీ వీసాదారులు అమెరికాలోనే ఉండిపోవాల్సి వచ్చిందని, అందులో కొందరి వీసా గడువు త్వరలోనే ముగియనున్న కారణంగా ఆందోళన చెందుతున్నారు.
