గురు పౌర్ణమి.. అతిపెద్ద చందమామ.. తప్పక చూడాల్సిందే..
జులై 13 పౌర్ణమి. ఈ రోజున అతి పెద్ద చందమామ కనిపించనున్నాడు. అంతేగాకుండా ఎంతో ప్రకాశవంతంగా కనిపిస్తాడు. కాకపోతే మన తెలుగు రాష్ట్రాల్లో జోరు వర్షాలు పడుతున్నాయి. పైగా ఆకాశంలో మబ్బులు ఉన్నాయి.
అందువల్ల మనం నేటి చందమామను చూడగలమో లేదో చెప్పలేం. సంపూర్ణ చందమామ ఉన్నప్పుడు అద్భుతమైన శక్తులను సాధించుకోవచ్చునని విదేశీయులు భావిస్తారట.
అలాగే సంపూర్ణ చందమామ అంటే పౌర్ణమి రోజున మగ దుప్పికి కొమ్ములు బాగా పెరుగుతాయట. అంటే అందువల్ల ఇవాళ్టి చందమామను దుప్పి చందమామ (Buck Moon) అని కూడా అంటున్నారు. ఇవాళ్టి మూన్‌ని పిడుగుల మూన్ (thunder moon) అని కూడా అంటారు. కారణం ఈ సీజన్‌లో పిడుగులు బాగా పడతాయి.
ఈ రోజున చందమామ భూమికి చాలా దగ్గరగా సంచరిస్తాడట. ఇవాళ రాత్రికి చందమామకు కొంత దగ్గర్లో శనిగ్రహం, గురుగ్రహం, అంగారక గ్రహం కనిపిస్తాయి. ఇవి అర్థరాత్రి తర్వాత బాగా కనిపిస్తాయి. ముఖ్యంగా ఎరుపు నారింజ రంగులో మార్స్ ఎక్కువ ప్రకాశవంతంగా కనిపిస్తుంది.
తూర్పు, ఆగ్నేయ దిశలో శనిగ్రహం కనిపిస్తుంది. గురుగ్రహం అర్థరాత్రి తూర్పు వైపున కనిపిస్తుంది. రాత్రి 2 తర్వాత మార్స్ ఎక్కువ కాంతితో కనిపిస్తుంది. ఇవాళ్టి నుంచి ఇది కాంతిని పెంచుకుంటూ పోతూ... అక్టోబర్‌లో అత్యంత ఎక్కువ కాంతివంతంగా కనిపిస్తుంది.
అందువల్ల మార్స్‌ని టెలిస్కోప్‌తో ఫొటో తియ్యాలంటే అక్టోబర్ సరైన సమయం. గ్రహాల్లో ఎక్కువ కాంతివంతంగా కనిపించే శుక్రగ్రహం జులై 14 ఉదయం 5 గంటలకు తూర్పువైపున మెరిసే వజ్రంలా కనిపిస్తుంది.
ఆ సమయంలో శుక్రగ్రహానికి కుడివైపున వరుసగా అంగారకుడు, గురుగ్రహం, చందమామ, శనిగ్రహం కనిపిస్తాయి. ఇవన్నీ అంతరిక్షంలో అద్భుతాలు. వీటిని మిస్సైతే మళ్లీ మళ్లీ రావు. ఇవి వచ్చినప్పుడే చూసేస్తే.. అదో మర్చిపోలేని అనుభవంగా మిగిలిపోతుంది.
