హెల్మెట్ లేకుండా వాహనం నడిపితే లైసెన్స్ రద్దు : సైబరాబాద్ పోలీస్
రోడ్డు ప్రమాదాల నివారణకు హైదరాబాద్ నగర పోలీసులు వివిధ రకాలైన చర్యలు చేపడుతున్నారు. విస్తృతంగా ప్రచారం చేస్తున్నారు. ఈ క్రమంల ఇపుడు సరికొత్త కఠిన నిర్ణయం అమలుకు శ్రీకారం చుట్టారు. ఇకపై, హెల్మెట్ లేకుండా వాహనం నడిపితే లైసెన్స్ రద్దు చేస్తామని సైబరాబాద్ పోలీస్ కమిషనరేట్ ప్రకటించింది.
వాస్తవానికి హెల్మెట్ లేకుండా వాహనం నడుపరాదన ట్రాఫిక్ పోలీసులు పదేపదే హెచ్చరికలు చేస్తున్నారు. అయినప్పటికీ నిత్యం వేలాది మంది వాహనచోదకులు ట్రాఫిక్ ఉల్లంఘనలను యధేచ్చగా ఉల్లంఘిస్తున్నారు. హెల్మెట్ లేకుండా వాహనం నడపడం వల్ల ఏదేని ప్రమాదం జరిగితే ప్రాణాలు కోల్పోతున్నారు. హెల్మెట్ పెట్టుకుంటే ప్రాణాపాయం నుంచి త‌ప్పించుకోవ‌చ్చ‌ని తెలిసిన‌ప్ప‌టికీ నిర్ల‌క్ష్యంగా, త‌మ‌కేం కాద‌నే ధోర‌ణితో వ్య‌వ‌హ‌రిస్తుంటారు.
దీంతో సైబరాబాద్ ట్రాఫిక్ పోలీసులు నిబంధ‌న‌ల‌ను మ‌రితం క‌ఠిన‌త‌రం చేస్తున్నారు. హెల్మెట్ లేకుండా ద్విచ‌క్ర వాహ‌నాలు నడిపితే శాశ్వతంగా డ్రైవింగ్ లైసెన్స్ రద్దుచేస్తామని హెచ్చరించారు. ఇకపై హెల్మెట్ ధరించకుండా బైక్‌ నడపుతూ పట్టుబడితే చలానాతో సరిపెట్టబోమని ట్విట్ట‌ర్‌లో పేర్కొన్నారు.
మోటారు వాహనాల సవరణ చట్టం 2019, సెక్షన్ 206 (4) ప్రకారం హెల్మెట్ లేకుండా బండి నడిపితే డ్రైవింగ్ లైసెన్స్ రద్దవుతుందని చెప్పారు. హెల్మెట్ లేకుండా ప్రయాణిస్తూ తొలిసారి పట్టుబడితే మూడు నెలలు, రెండోసారి పట్టుబడితే శాశ్వతంగా డ్రైవింగ్ లైసెన్స్ రద్దు చేయడానికి సంబంధిత ఆర్టీవో అధికారులకు సిఫారసు చేస్తామని తెలిపారు. దీనిపై ఓ వీడియోనూ విడుదల చేశారు.
