రెండో రోజూ వేడెక్కిన తెలంగాణ అసెంబ్లీ... ఆరుగురు కాంగ్రెస్ సభ్యుల సస్పెషన్
బడ్జెట్ సమావేశాల రెండో రోజు అసెంబ్లీలో వాడీవేడి చర్చ జరిగింది. గవర్నర్ ప్రసంగానికి ధన్యవాదాలు తెలిపే తీర్మానంలో భాగంగా.. చేపట్టిన చర్చలో కాసేపు గందరగోళం నెలకొంది.
ఇదే సమయంలో అధికార ప్రతిపక్ష నేతల మధ్య మాటల యుద్ధం నెలకొంది. సభా వ్యవహరాలకు అడ్డుపడుతున్నారంటూ ఆరుగురు కాంగ్రెస్ సభ్యులను సభ నుంచి ఒక రోజు సస్పెండ్ చేశారు. రెండో రోజు అసెంబ్లీ సమావేశంలో భాగంగా ఆసక్తికర పరిణామాలు చోటు చేసుకున్నాయి.
గవర్నర్ ప్రసంగానికి ధన్యావాదాలు తెలిపే తీర్మానంపై చర్చ ప్రారంభమవ్వగా.. కాంగ్రెస్ సభ్యులు గవర్నర్ ప్రసంగాన్ని వ్యతిరేకించారు. ప్రసంగం ఆసాంతం ప్రభుత్వాన్ని పోగడటమే సరిపోయిందని ములుగు ఎమ్మెల్యే సీతక్క విమర్శించారు.
గవర్నర్తో అబద్ధాలు.. రాష్ట్ర ప్రభుత్వం గవర్నర్ తమిళిసైతో అబద్ధాలు చెప్పించారని కమలం పార్టీ ఎమ్మెల్యే రాజాసింగ్ ఆరోపించారు. ఎన్నికల్లో ఇచ్చిన హామీల్లో ఒక్కదానిని కూడా అధికార పార్టీ నిలబెట్టుకోలేకపోయిందని తెలిపారు.
బడ్జెట్ సమావేశాల్లో ప్రభుత్వ వైఫల్యాలను ఎండగడుతామని రాజాసింగ్ స్పష్టం చేశారు. సీఏఏపై తర్వాత చర్చిద్దాం.. చర్చలో ఎంఐఎం శాసనసభాపక్ష నేత అక్బరుద్దీన్.. సీఏఏ అంశాన్ని ప్రస్తావించారు.
ఈ అంశంపై సభలో చర్చ జరగాలని కోరారు. దీనిపై స్పందించిన సీఎం కేసీఆర్ ఇది సమయం కాదని హితవు పలికారు. సీఏఏపై తర్వాత చర్చిద్దామని స్పష్టం చేశారు. కోమటిరెడ్డి ఆగ్రహం.. కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి గవర్నర్ ప్రసంగంపై నిప్పులు చెరిగారు.
ఈక్రమంలోనే అధికార, ప్రతిపక్ష ఎమ్మెల్యేల మధ్య వాగ్వాదం చోటు చేసుకుంది. కాంగ్రెస్ ఎమ్మెల్యే కోమటిరెడ్డి రాజగోపాల్రెడ్డి మాట్లాడుతుండగా మంత్రి ప్రశాంత్రెడ్డి అడ్డుపడ్డారు. ప్రజల తరపున ప్రశ్నించే గొంతును నొక్కేస్తున్నారని రాజగోపాల్రెడ్డి మండిపడ్డారు.
