మహిళలకు గౌరవం ఇచ్చి తీరాల్సిందే.. అదెలాగో తెలుసుకోండి!
అనాదిగా మహిళలకు గౌరవం ఇచ్చే సంస్కృతి మనది. కొన్ని జాఢ్యాల వల్ల మూఢత్వం పెరిగి మహిళల పట్ల చిన్నచూపు చూడటం ప్రారంభమైంది. ఫలితంగా ఎన్నో ప్రతికూల ప్రభావాలు కనిపిస్తున్నాయి. ఇందుకు ప్రధాన ఉదాహరణగా లింగ నిష్పత్తిలో మార్పులు చోటు చేసుకోవడాన్నే చెప్పుకోవచ్చు. ఇదే సెక్స్ రేషియో కొనసాగితే మాత్రం మున్ముందు మరిన్న ఇక్కట్లు తప్పవు. అందుకే సమాజంలో మహిళలకు తగిన గౌరవంతో పాటు సముచిత స్థానం కల్పించాల్సిన అవసరం ప్రతి పురుషునిపై ఉందని చెప్పడమే కాకుండా పురుష లక్షణంగా చెప్పుకోవచ్చు.
మన ఇంటి స్త్రీ అయినా.. పరాయి మహిళ అయిన సరే వారికి ఇవ్వాల్సిన గౌరవం ఇచ్చితీరాల్సిందే. ఇందుకోసం చిన్నచిన్న విషయాలను కూడా పాటించాల్సి ఉంటుంది. ఇలాంటి వాటిని ఒకసారి పరికిద్దాం.
మీ సహ ఉద్యోగి మహిళ అయితే సమావేశ మందిరానికి వెళ్లే సమయంలో ఆమెకు మొదట అవకాశం ఇవ్వాలి. మహిళలు వారి పనులు వారు చేసుకునేలా ప్రోత్సహించాలి. ఇలా చేయడం వల్ల పురుషులకు కాస్త శ్రమ తగ్గడమేకాకుండా మహిళలు బాహ్య ప్రపంచంతో సంబంధాలు ఏర్పరచుకునేందుకు ఉపకరిస్తాయి.
మన ఇంటిలోని మహిళలు ఎవరైనా కావొచ్చు. వారు చెప్పే మాటలను అంత తేలికగా తీసుకోకుండా తగిన విలువ ఇవ్వాలి. వర్కింగ్ ఉమెన్స్ పట్ల అసభ్యంగా ప్రవర్తించరాదు. ప్రధానంగా వంట కేవలం మహిళల బాధ్యత అని అనుకోరాదు.
ఒకవేళ మీకు వంట రాకపోతే కూరలు తరగడం వంటి సహాయం చేయాలి. పైపెచ్చు మహిళలు ఉద్యోగం చేయడం వల్ల మీ కుటుంబానికి ఆర్థికంగా వెసులుబాటు లభిస్తుంది. అందువల్ల వారిని ఉద్యోగాలకు ప్రోత్సహించడం అలవర్చుకోవాలి.
ఇలా చిన్న చిన్న సహాయాలు చేస్తూ వారికి చేదోడు వాదోడుగా ఉంటే వారిని గౌరవించినట్టుగా మాత్రమే వారి పట్ల మర్యాదగా ప్రవర్తించినట్టుగా కూడా వారు భావిస్తారు.
