గురువారం, 28 మార్చి 2024
  1. వార్తలు
  2. తెలుగు వార్తలు
  3. చెన్నై వార్తలు
Written By ఠాగూర్
Last Updated : బుధవారం, 16 డిశెంబరు 2020 (10:50 IST)

ఎమ్మెల్యేగా పోటీ చేయనున్న తమిళ నటుడు విశాల్!

తెలుగు మూలాలు ఉన్న తమిళ హీరో విశాల్. ఆయనకు రాజకీయాలకు ఎంతో సంబంధం ఉంది. గతంలో మాజీ ముఖ్యమంత్రి జయలలిత ప్రాతినిథ్యం వహించిన ఆర్కే నగర్ అసెంబ్లీ స్థానానికి జరిగిన ఉప ఎన్నికల్లో పోటీ చేసేందుకు సర్వశక్తులా పోరాటం చేశారు. 
 
నామినేషన్ కూడా వేశాడు. అయితే నామినేషన్‌ను ప్రతిపాదించిన వారిలో కొంత మంది తమ మద్దతును ఉపసంహరించుకోవడంతో ఎన్నికల కమిషన్‌ విశాల్‌ నామినేషన్‌ను తిరస్కరించింది. దీంతో ఆ ఉపఎన్నికల్లో విశాల్‌ పోటీ చేయలేకపోయాడు. ఓ వర్గం ఆయన్ను అడ్డుకోవడంతో ఈ పరిస్థితి తలెత్తింది. 
 
ఈ క్రమంలో మరో ఆరు నెలల్లో తమిళనాడు అసెంబ్లీ ఎన్నికలు జరగబోతున్న నేపథ్యంలో అక్కిడి రాజకీయాలు రసవత్తరంగా మారుతున్నాయి. సూపర్‌స్టార్ రజినీకాంత్ ఈ ఎన్నికల బరిలోకి దిగేందుకు సన్నాహలు చేసుకుంటున్నారు. యువ హీరో విశాల్ కూడా ఈ ఎన్నికల్లో పోటీ చేయాలని భావిస్తున్నారు. 
 
ఇప్పటికే, నడిగర్‌ సంఘం ప్రధాన కార్యదర్శిగా, తమిళ చిత్ర నిర్మాతల మండలి అధ్యక్షుడిగా పోటీ చేసి గెలుపోందిన విశాల్ రాబోయే అసెంబ్లీ ఎన్నికల్లో కూడా పోటీ చేయబోతున్నాడట. చెన్నై నగర పరిధిలోని ఆర్కే నగర్ అసెంబ్లీ నుంచి ఎమ్మెల్యేగా పోటీ చేయాలని భావిస్తున్నాడట. ఇప్పటికే అభిమాన సంఘాల నేతలతో చర్చలు కూడా జరిపాడట. రాబోయే ఎన్నికల్లో మాత్రం ఎలాగైనా బరిలోకి దిగాలని విశాల్ ప్లాన్ చేస్తున్నాడట.