హామిల్టన్‌లో చాప చుట్టేసిన టీమిండియా.. అతి తక్కువ స్కోర్లు చిట్టా ఇదే...
న్యూజిలాండ్ పర్యటనలో ఉన్న భారత క్రికెట్ జట్టు గురువారం హామిల్టన్ వేదికగా జరిగిన నాలుగో వన్డే మ్యాచ్‌లో అతి తక్కువ స్కోరుకే చాపచుట్టేసింది. కివీస్ బౌలర్ ట్రెంట్ బోల్ట్ ధాటికి భారత ఇన్నింగ్స్ పేకమేడలా కూలిపోయింది. ఏ ఒక్క బ్యాట్స్‌మెన్ కూడా 20 పరుగులకు మించి చేయలేక పోయారు. ఆల్‌రౌండర్ హార్దిక్ పాండ్యా ఒక్కడే అత్యధికంగా 18 పరుగులు చేశాడు. అయితే, భారత జట్టు న్యూజిలాండ్‌పై సాధించిన ఈ 92 పరుగులు వన్డేల్లో ఏడో అత్యల్ప స్కోరు కావడం విశేషం. అంతకుముందు భారత్ చేసిన తక్కువ స్కోర్ల వివరాలను పరిశీలిస్తే,
* 2000 సంవత్సరంలో శ్రీలంకతో జరిగిన మ్యాచ్‌లో భారత్ కేవలం 54 పరుగులు మాత్రమే చేసింది. ఈ మ్యాచ్‌లో లంక జట్టు 300 పైచిలుకు పరుగులు చేస్తే భారత్ అతి తక్కువ స్కోరుకు ఆలౌట్ అయి అప్రతిష్టపాలైంది.
* 1981లో జరిగిన ప్రపంచ కప్‌లో ఆస్ట్రేలియాపై టీమిండియా కేవలం 63 పరుగులకు ఆలౌటైంది. ఆ మ్యాచ్‌లో గ్రెగ్ చాపెల్ ఐదు వికెట్లు తీశాడు. గుండప్ప విశ్వనాథ్ (23), రోజర్ బిన్నీ (16) మాత్రమే రెండంకెల స్కోర్లు అందుకున్నారు.
* 1986లో కాన్పూర్‌లో జరిగిన వన్డేలో 196 పరుగుల లక్ష్యంతో బరిలోకి దిగిన భారత్.. కేవలం 78 పరుగులకు ఆలౌటైంది. ఆ మ్యాచ్‌లో అర్జున రణతుంగా నాలుగు వికెట్లు తీసి లంకకు విజయం సాధించి పెట్టాడు.
* 1978లో పాకిస్థాన్‌తో జరిగిన మ్యాచ్‌లో భారత జట్టు 79 పరుగులకు ఆలౌట్ అయింది. ఈ మ్యాచ్‌లో 80 పరుగుల టార్గెట్‌ను పాకిస్థాన్ 17 ఓవర్లలో ఛేదించింది.
* 2010లో జరిగిన మ్యాచ్‌లో ఇండియా కేవలం 88 పరుగులకు ఆలౌటైంది. ఇప్పటికే కివీస్‌పై భారత్‌కు ఇదే అత్యల్ప స్కోరుగా ఉంది.
* 2006లో సౌతాఫ్రికాతో జరిగిన వన్డే మ్యాచ్‌లో టీమిండియా 91 పరుగులకు ఆలౌటైంది. ఆ మ్యాచ్‌లో సఫారీలు 157 పరుగుల తేడాతో విజయం సాధించింది.
* 2019 జనవరి 31వ తేదీన హామిల్టన్ వేదికగా జరిగిన మ్యాచ్‌లో భారత్ 92 పరుగులకు ఆలౌట్ కాగా, కివీస్ 8 వికెట్ల తేడాతో గెలుపొందింది.
