నకిలీ డ్రగ్స్ వేధింపులు భరించలేక యువ నటి ఆత్మహత్య... ఎక్కడ?
ఓ యువనటి బలవన్మరణానికి పాల్పడింది. డ్రగ్స్ కేసులో పేరు వెల్లడించకుండా ఉండాలంటే రూ.20 లక్షలు ఇవ్వాలంటూ డిమాండ్ చేస్తూ, పదేపదే వేధించడాన్ని తట్టుకోలేక ఆత్మహత్య చేసుకుంది. ఇలా వేధింపులకు పాల్పడింది నకిలీ అధికారులు కావడం గమనార్హం. ఈ దారుణం ముంబైలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, 28 యేళ్ళ బాధిత నటి ఈ నెల 20వ తేదీన ఓ నక్షత్ర హోటల్‌లో పార్టీకి వెళ్లింది. అక్కడామెను కలిసిన ఇద్దరు వ్యక్తులు తాము నార్కోటిక్స్ కంట్రోల్ బ్యూరో (ఎన్.సి.బి) అధికారులమని తమను తాము పరిచయం చేసుకున్నారు. అయితే, డ్రగ్స్ కేసులో పేరు బయటపెట్టకుండా ఉండాలంటే రూ.20 లక్షలు ఇవ్వాలంటూ డిమాండ్ చేశారు.
ఆ తర్వాత పదేపదే ఆమెకు ఫోన్ చేస్తూ వేధించసాగాడు, పైగా, డబ్బులు ఇవ్వకుంటే పేరు లీక్ చేస్తామంటూ బెదిరించారు. వారి వేధింపులను భరించలేని ఆమె గురువారం తన గదిలో ఫ్యాన్‌కు ఉరివేసుకుని ఆత్మహత్య చేసుకుంది. ఈ విషయం వెలుగులోకి రావడంతో కేసు నమోదు చేసిన పోలీసులు ఆమెను వేధించిన మోహన్ పర్దేశి (38), ప్రవీణ్ కుమార్ వలింటే (35)అనే ఇద్దరిని అరెస్టు చేశారు. వీరివద్ద పోలీసులు జరిపిన విచారణలో వీరిద్దరూ నకిలీ ఎన్సీబీ అధికారులని తేలింది.
