ఆస్ట్రేలియాలో మిస్టరీ వస్తువు! దేవుడా.. అది చంద్రయాన్-3కి..?
ఆస్ట్రేలియన్ స్పేస్ ఏజెన్సీ పశ్చిమ ఆస్ట్రేలియాలోని జురియన్ బే సమీపంలోని బీచ్‌లో కనుగొనబడిన ఒక వస్తువును పరిశీలిస్తోంది. ఇది భారతదేశ చంద్రయాన్-3 మిషన్‌కు చెందినది కావచ్చు అనే ఊహాగానాలు మొదలయ్యాయి. ఆదివారం మధ్యాహ్నం మిడ్ వెస్ట్ కోస్ట్‌లోని గ్రీన్ హెడ్ టౌన్ సమీపంలో ఈ వస్తువు నీటిలో తేలియాడుతూ కనిపించింది. ఆస్ట్రేలియా తీరంలో అంతుచిక్కని వస్తువు కనిపించడం కలకలం రేపింది.
పశ్చిమ ఆస్ట్రేలియాలోని గ్రీన్ హెడ్ పట్టణం తీరంలో ఇది కనిపించింది. డ్రమ్‌ ఆకారంలో ఉన్న ఈ వస్తువు రాగితో చేసినదేమిటో అర్థంకాకపోవడంతో స్థానికులు రకరకాలుగా చర్చించుకుంటున్నారు.
ఇప్పుడు అది రాకెట్ నుంచి విడిపోయిన శకలమై ఉండొచ్చనే చర్చ నడుస్తోంది. ఈ వస్తువుకు దూరంగా ఉండాలని స్థానిక అధికారులు స్థానికులను హెచ్చరించారు. ఈ వస్తువు ఏమిటి? ఎక్కడి నుంచి వచ్చింది? ఈ వస్తువు గురించి తెలుసుకోవడానికి ఆస్ట్రేలియన్ స్పేస్ ఏజెన్సీ కూడా రంగంలోకి దిగింది.
ఇది విదేశీ అంతరిక్ష ప్రయోగానికి సంబంధించినదని అంచనా. ఇందుకు సంబంధించి పలు దేశాలతో ఆస్ట్రేలియన్ స్పేస్ ఏజెన్సీ సంప్రదింపులు జరుపుతున్నట్లు సోషల్ మీడియాలో వెల్లడైంది. కాగా, ఈ వస్తువు భారత్‌కు చెందిన పీఎస్‌ఎల్‌వీ రాకెట్‌కు సంబంధించినదని అంతరిక్ష నిపుణులు అంటున్నారు.
