కరోనా కథ ముగిసినట్టే.. చీకటి గుహలో వెలుగు రేఖ కనిపిస్తోంది.. డబ్ల్యూహెచ్‌వో
ప్రపంచ దేశాలకు చుక్కలు చూపించిన కరోనా కథ ముగిసినట్టేనని ప్రపంచ ఆరోగ్య సంస్థ (డబ్ల్యూహెచ్ఓ) పేర్కొంది. కోవిడ్‌-19 తాలూకు అత్యంత భయానకమైన దశ ముగిసిపోయినట్టేనని వెల్లడించింది.
వైరస్‌ వెలుగులోకి వచ్చిన రెండున్నరేళ్లకు ఆ మహమ్మారి తోకముడిచే రోజులు వచ్చేశాయని డబ్ల్యూహెచ్ఓ తెలిపింది. ఇకపై కేసుల అంతగా పెరుగుదల ఉండదు. అలాగని పూర్తిగా తగ్గి జీరో కేసులకు వచ్చే పరిస్థితి కూడా లేదని డబ్ల్యూహెచ్ఓ అంచనా వేసింది.
"రెండున్నరేళ్లుగా మనం చీకటి గుహలో బతుకులు వెళ్లదీస్తున్నాం. ఇప్పుడు గుహ చివర్లో వెలుగు రేఖ కనిపిస్తోంది. అయితే అక్కడికి చేరుకోవడానికి ఇంకా చాలా దూరముంది. అప్రమత్తంగా లేకుంటే ఇంకా ఎన్నో అడ్డంకులు వస్తాయి'' అని డబ్ల్యూహెచ్ఓ డైరెక్టర్‌ జనరల్ టెడ్రోస్‌ అన్నారు. అలాగే కరోనా వైరస్‌ బలహీనపడిపోయిందని అశోకా యూనివర్సిటీకి చెందిన ప్రొఫెసర్‌ గౌతమ్‌ మీనన్‌ కూడా తెలిపారు.
