ఒంటరిగా వున్న యువతి.. బలవంతంగా ముద్దు పెట్టబోతే.. కరోనా కాపాడింది.. ఎలా?
చైనాలో కరోనా వైరస్ కారణంగా 600మందికి పైగా ప్రాణాలు కోల్పోయారు. కరోనా మహమ్మారితో చైనా ప్రజలు వణికిపోతున్నారు. ప్రపంచ దేశాలు కూడా కరోనాతో భయం భయంగా గడుపుతున్నాయి. అయితే ఈ చైనా కరోనా వైరస్ ప్రపంచ ప్రజలను బలితీసుకుంటుంటే.. ఆ వైరస్ కారణంగా ఓ యువతి ప్రాణాలతో బయటపడింది. చైనాలో గత ఏడాది డిసెంబర్ నుంచి వందలాది మందిని కరోనా వైరస్ బలిగొంటోంది.
కానీ కరోనా వైరస్ కారణంగా ఓ యువతి పెద్ద ప్రమాదం నుంచి తప్పుకుంది. వివరాల్లోకి వెళితే.. చైనా వుహాన్ నగరానికి సమీపంలోని జింగ్‌షాయ్ అనే నగరంలో ఓ యువతి ఒంటరిగా జీవనం గడుపుతోంది. ఆమె ఇంట్లోకి ఓ యువకుడు చొరబడ్డాడు. అంతేగాకుండా ఆమెను బలాత్కారం చేయబోయాడు. ఇంకా ఆమెను బలవంతంగా ముద్దు పెట్టుకునేందుకు ప్రయత్నించాడు.
కానీ ఇంతలో అతని చెర నుంచి తప్పించుకోవాలనుకున్న ఆ యువతి బుద్ధికి పదునుపెట్టింది. దగ్గు, జ్వరం, జలుబు వున్నట్లు నటించింది. చాలాసేపు అలానే దగ్గుతూ వుండిపోయింది. అంతేగాకుండా తనకు కరోనా వుందని అబద్ధం చెప్పింది.
కరోనా కారణంగానే తాను ఒంటరిగా వున్నట్లు అతడితో తెలిపింది. ఈ విషయం విన్న ఆ యువకుడు ఆ యువతి గృహం నుంచి పారిపోయాడు. ఆపై ఆ యువతి ఇచ్చిన ఫిర్యాదుతో యువకుడిని పోలీసులు అరెస్ట్ చేసి.. కేసును దర్యాప్తు జరుపుతున్నారు.
